Shillong Jylliew 28: Ka Sorkar Jylla kala dep ban pynmih ia ka jingpynbna paidbah na ka bynta ban pyntreikam noh ia ki aiñ kiba iadei bad ki kam sniew kiban treikam naduh ka 1 tarik u Naitung 2024.
Haba pyntip ia kane hynne ka sngi thohdieng, u Myntri Rangbah u Conrad K Sangma ula ong, “Ka sorkar Meghalaya kala dep pynmih ia ka jingpynbna paidbah ban pyntreikam.noh ia kitei ki aiñ kiba thymmai kiba iadei bad ki kam sniew”.
Ula ong, ba kitei ki aiñ kiba thymmai kin ym ktah eiei ia ki kam bishar jong ki iingkashari ne Court jongki District Council.
“Em ngin pyntreikam hynrei ki aiñ kiba la don lypa jongki District Council kin ym shah ktah. Ki aiñ bad ki kanun jongki District Council kin iai bteng ban treikam bad ka bor ka jongki ruh kan neh kumba ka ju long, u pud u sam jongki ruh yn neh kumba long, kumta kam don kano kano ka jingkylli ba kan don ka jingktah ia ki aiñ bad ia ka bor jongka kam bishar jong ki District Council.”
