Shillong, Jylliew 27: Ka Hynniewtrep Border Disputes Redressal Forum (HBDRF) kala kyrpad ia u Myntri Rangbah ka jylla Conrad K Sangma ba un tuklar lem halor ka jingkynnoh ba kala don ka jingdawa na ka Socheng Amreng Border Development Committee (SABDC) ban rejistar ia ka jaka bad ban pynieng biang ia ka khyrdop khrong khajna haka shnong Khanduli, West Jaintia Hills District.
Ha ka dorkhas kaba la phah sha u Conrad K Sangma hynne ka sngi Balang, u Chairman ka Forum Bah C Sungoh ula ong ba ka jingdawa ki Karbi lyngba ka SABDC ban pynieng biang iaka khyrdop khajna kadei kaba pawshai ba ki kwah ban kyntur pud. Ula ong ba ka Khanduli bad Myn-I (Am-ih ha Karbi) kim dei satia kiba don hapdeng ka jingiakajia pud bad ki don ha hapoh u pud u sam jong ka Meghalaya.
“Kumta, ngi lah kyntu ia ka sorkar ba kadei ban tuklar lem mardor ia katei ka kam bad ka sorkar Assam, khnang ba ki briew ki jong ngi kin ioh ia ka hok, bad ban pynneh ia ka shongsuk shongshngaiñ” ula ong.
“Ka jingdawa ki Karbi ban rejistar ia ki jaka ki paidbah ki jong ngi ha ka Karbi Anglong Autonomous Council (KAAC) kadei ka buit ne ka jingthmu ban kyntur ia u pud u sam jong ngi. Ngi kwah ruh ba ka sorkar kadei ban kdew shai ba ka Rtiang Sanphaw (Arting), Mookoiram Myn-I, Lakaroi ki dei kiba hap hapoh ka Meghalaya khnang ba kan ym don kano kano ka jingklumar jingmut jong ki nongshong shnong ha kitei ki shnong” pynpaw u Bah Sungoh ha k ashithi.
Ula ong ba ka KAAC kala pynieng ia ki khyrdop lum khajna ha ka shnong Khanduli ha ka 15 tarik u Iaiong, 2023.
“Ban iada ia u pud u sam jong ka shnong, ki nongshong shnong ka Khanduli kila weng iaka jingthoh ne ‘Signboard’ jong ka khyrdop lum khajna haka 16 tarik u Iaiong 2023. Naduh katei ka por, kala mih ka jingiashrut ha katei ka thaiñ hapdeng ki Khasi-Pnar bad ki Karbi.
Nalor kane ki Karbi kila khang ruh ia ki Khasi-Pnar jongka Khanduli ban leit rep leit riang ha ki jaka rep ne ki pynthor ki jongki kiba don ha Karbi bad ki jaidbynriew Khasi-Pnar kila mad ia ka jingshah khang lynti bad ka jingshah khang ban trei ban ktah”.
U Bah Sungoh ula ong ba ka jingpynbeit ia katei ka kam bad ban wanrah ia ka shongsuk shongsain ha kitei ki jaka, ka sorkar Assam bad Meghalaya kila weng noh ia ka khyrdop lum khajna ha ka 16 tarik u Iaiong 2023.
Ha kajuh ka por u Symbud Myntri Rangbah ka jylla u Bah Sniawbhalang Dhar bad u Myntri ka sorkar Assam u Piyush Hazarika kila leit ban jurip ia kitei ki jaka.
“Hynrei ki Karbi kim shym la pdiang ne burom ia ka rai jong kitei ki ar tylli ki sorkar jylla bad kila sdang dawa biang ban pynieng ia ka khyrdop lum khajna ha katei kajuh ka jaka.
Ka long kaba shai kdar ba katei ka jingdawa ki Karbi ka long pyrshah ia ka rai jong ki artylli ki sorkar jylla bad ki ar tylli ki District Council bad ka paw kumba ki pyrshang ban pynmih iaka jingiashrut bad jingiakynad hapdeng kitei ki ar tylli ki jaidbynriew” ula ong.
