Shillong Nailar 11: U Symbud Myntri Rangbah ka jylla u Bah Prestone Tynsong u la ong, lada ki paidbah ki pyrshah jur iaka aiñ Khalai ne Meghalaya Regulation of Gaming Act 2021, ka sorkar kan ym pyniaid shuh shakhmat ban pyntreikam ia kane ka Ain hynrei kan sngap iaka sur jong u paidbah ka jylla.
“Ka Ain khalai ka dei kaba la don lypa hapoh ka Jylla hynrei ka Sorkar MDA kala shu buh tang ia ki kyndon pyrrkhing bad pynrung thymmai ia ka kyndon ba lah ban buh ia ka Casino” ong u Bah Prestone haba pynshai ia ki jingkynnoh ba kane ka Sorkar ba mynta ka pynshlur ia ki kam khalai.
Kat kum ka jingong jong u, “Ka sorkar naduh kaba sdang, kala kren da kaba shai, ba ia ka Casino ym dei ban buh ha Shillong, Jowai, Nongstoin ne Tura hynrei ban buh ha ka jaka kaba jngai tang kumba 4 ne 5 Km na ka Nongbah Guwahati”.
“Ngi la rai ruh ba ki nongshongshnong ka Jylla kin ym lah satia ban leit rung ha kane ka jaka khalai hynrei kan dei beit thik tang ia ki nongwan jngohkai” ula bynrap.
Halor ka jingpyrshah jong ki Kynhun bapher bapher kynthup ki Seng Niam, u Bah Prestone ula ong “Haduh mynta hi ngim pat rai ba ngin pyniaid beit shakhmat ia kane ka kam bad kam pat don hi ruh kaba kum kata. Nga kren shai ba kano kano kaba ngin leh, ngin leh hadien ka jingtwad jingmut shuwa na baroh bad da ka jingiasngewthuh jingmut lang”.
Haba kylli u Bah Prestone u la ong, “Lada ki paidbah ki pyrshah balei ngin shu leh jubor bad kane ka sorkar kaba mynta, naduh ka ishu Them Metor, Ichamati, CAB bad ka jingeh ka mih kawei hadien kawei, ka sorkar ka shim beit ia ka rai kaba yn pdiang lang da ki paidbah Nongshong shnong ka Jylla”.
