Shillong, Nailar 11: Ka Iingkashari Meghalaya High Court hynne ka sngi palei, kala bthah ia ka Sorkar Jylla ban peitngor bha ia baroh ki jingtei kiba mih marjan ka Pung Umiam, kiba lah ban ktah ia ka Pung Umiam.
Ha ka hukum bala pynmih halor ka jingshong bishar ia ka mukotduma, ka Iingkashari ba pura (full bench) kala ong ba watla ka paw ba kala don ki sienjam ban pynkhuid ia ka Pung Umiam bad ka jingpynkhuid ia ki nuit kiba per harud ka pung, hynrei la shem pat ia ka jingmih ki jingtei ba thymmai harud jong kane ka pung.
Ka don kawei ka café ba thymmai kaba mih shaphang lam mihnngi marjan ka jaka die kali (showroom). Kala don ka jing tei ba dang mih ha kajuh ka liang ba jngai tang 100 meter eiei sharum ka surok. Kala don ruh sa kawei ka jingtei shaphang shatei bad kaba jan iatakahuh bad ka um ha ka Pung Umiam.
“La kyrmen ba baroh ki jingtei kiba lah ban ktah ia ka Pung Umiam kin dei kiba la peitngor bha bad ban pynthikna ruh ba kine ki jingtei ki dei ban long kat kum ki kyndon jong ka ain hadien bala shim ia ka Environmental Impact Assessment” kala ong.
Ka Iingkashari kala bthah ruh ia ka Sorkar Jylla ban ai jingtip halor ki jingtei kiba dang iaid mynta harud jong ka pung Umiam kynthup ka café ba thymmai ba dang shu dep shna bad kiwei kiwei ki project kiba dang thmu ban tei ia kiba la ioh jingbit ne kiba dang pan jingbit ruh kumjuh.
Ka Iingkashari ka ong ba haba iadei hi bad ka jingkhuid jong ka pung Umiam, la kyrmen ba ki sienjam bala shim dang shen ba kin dei kiba dang iai bteng beit bad ban pynthikna ruh ba buh ia ki signboard khnang ba baroh ki trai shnong ne ki nongwankai kin nym bret pathar ia ki jakhlia shapoh ka pung.
Ka Iingkashari kala aijingmut ruh ban thung ia ki Volunteers na ki shnong ba marjan ka pung ba kin peit ia ka jinglehkhuid bad ban siew ruh ia ki da ki kynja honorarium.
Ka Iingkashari kala bthah ia ka Sorkar Jylla ban file affidavit hapoh k alai taiew halor kane ka hukum ba pynmih hynne ka sngi. Ka Kashari kala buh ban shong bishar biang ia ka kam ha ka 12 tarik u Nailur.
