Imphal, Nailar 11: Ia ka pakhang surok ka ba la neh hynriew sngi kynthih la pynsangeh noh da ka All-Tribal Student Union Manipur (ATSUM), ha lynter ka surok National Highway-2 (Imphal-Dimapur), hynnin ka miet sngi Balang bad ka leit ka wan jong ki trok kit mar ka la iaid shakhmat, ong ki nongialam ka seng bad ki heh sorkar.
Hadien ba la khot pynlong ia ka jingialang ka ba kyrkieh bad ki unit jong ki seng ki ba don ha katei ka kynhun hakhliehduh jong ki trai shnong hynnin ka sngi Balang, na ka liang u General Secretary ka ATSUM u S.R. Andrea u la pynbna ba ka seng ka la shim ia ka rai ban pynsangeh shipor ia kane ka jingpakhang ia ki kali kit mar.
“Ha ba iai ban halor ka nongrim jong ka ATSUM ha ka ba iadei bad ka ADC Bill 2021, bad da ka ba bishar bniah halor ki jingeh jong ki paidbah namar kane ka jingpakhang ia ki kali kit mar, ka ATSUM ka la shim ia ka rai ban pynsangeh mardor ia kane ka jingiakhih ka jong ki ha ki surok National Highway ka jylla,” ong u Andrea hynnin ka miet sngi Balang.
Nalor kata u la ong ruh; “Ngi la pynbeit ban bteng ia ki jingiakhih da kiwei pat ki rukom jong ka synshar paidbah.Ka Seng ka kyrpad ruh ia baroh ba kin iai bteng ban ai ka jingkyrshan ia kane ka jingialeh ka jong ki khnang ban pynioh ia ka lawei ka ba phyrnai na ka bynta ki nongshong shnong ki ba trei ki trai shnong.”
Na ka liang ki heh sorkar ka Manipur ruh ki la ong ba ka ATSUM, ka ba la khot pynlong ia kane ka pakhang surok naduh ka sngi Thohdieng ba la dep, ka la dawa ba ia ka Manipur (Hill Areas) Autonomous District Council (Amendment) Bill, 2021 dei ban wanrah hapoh ka Assembly khnang ban nang aibor shuh shuh ia ki council bad ia ki tnat treikam jong ki trai shnong ki la pynsangeh noh ia kane ka pakhang surok ka jong ki hynnin ka miet sngi Balang.
Namar kane ka jingpakhang surok, da ki spah tylli ki trok kit mar ki la sahkut naduh ka sngi Thohdieng ba la lah ha lynter ka surok National Highway-2, ka ba pyniasoh ia ka Manipur bad kiwei pat ki bynta jong ka ri lyngba ka surok lyngba ka Nagaland.
Na ka liang ki bor pahara ki la synran ia ki 510 tylli ki trok kit mar ba kin leit sha ki jaka ki ba ki thmu ha kane ka janmiet sngi Nyngkong ba la lah, hynrei hadien kane sa kumba 700 tylli ki trok ki dang sahkut bad kiwei pat ruh ki kali kit mar ki la sahkut lut ha kane ka surok national highway hadien ba katei ka kynhun ki seng samla pule ka la bteng ia ka jingpakhang surok haduh hynnin ka jan miet sngi Balang.
Ka sorkar Manipur hadien ba ka la pynlong ia ki jingialang ki ba bteng naduh ka sngi U Blei bad ka sngi Nyngkong ba la depka la iasoi ia ka soskualr bad ki nongialam ka ATSUM ha kane ka sngi Nyngkong ba la lah.
Hadien kane ka jingialang, ka sorkar ka la pyllait noh ia baroh ki san ngut ki nongialam ka ATSUM ki ba la shah kem noh ha ka 2 tarik mynta u bnai.
