Shillong, Jylliew 20 : U MP ba marwei ka Jylla sha Rajya Sabha Dr WR Kharlukhi ha ka sngi Palei, ula ong ba ka daw ba hakhmat eh ha lyndet ka jingshah rem ka National People’s Party (NPP) dang shen ha ka elekshon Lok Sabha na Tura bad Shillong seat ka dei namar ka ‘State Reservation Policy” ym namar ba kyrshan ka BJP.
Kat kum ka jingong jong u, kan bha shibun ia ka party ban rem ia ka elekshon na ka bynta ka jingiatylli jong ka Jylla.
Une u President barim ka Meghalaya NPP ula maham ruh ba ka dei ka dak kaba sniew ia ka Jylla lada ia ka elekshon la jop tang namar ka jingshah jingit ban dawa pynkylla ia ka Job Reservation Policy.
Haba iakren bad ki lad pathai khubor, u Dr Kharlukhi ula ong ba ka NPP kala iatakhuh bad ka lyer kyrshan VPP ha Ri-lum Khasi Jaintia bad ka lyer kyrshan Congress ha Ri-lum Garo ha ka elekshon Lok Sabha ba dang shu dep.
“Ha baroh ar jaka, ngi rem namar ka State Reservation Policy. Hangne (Khasi-Jaintia), ki kwah pynkylla, ki khmih ia ngi kum kiba pyrshah bad sha Garo pat, kim pat ban pynkylla bad ki khmih ia u Myntri Rangbah kum u briew ba shimkhia ia ka jingdonkam ka Khasi Hills” ula ong bad bynrap “Hynrei nga iaroh shisha ia u CM namar ka don ka por ha ka Politics ba na ka bynta ka jingiatylli ka Jylla, kan bha ba ngin ren ia ka elekshon hynrei kum u Statesman, phi lah ban rai ia kaei kaba bha”.
“Ha ka khep ba jur ka jingiakhih kaei kaba u CM ula leh, ula hap ban khot ia ka jingialang bad u hap ban mynjur ban pynkylla namar ha ka jingiohi jong u, hooid kane ka dei tang ka lynti bad nga tharai kala sangah ia ngi shatei bad sangah ia ngi shane ruh” ula ong.
U Dr Kharlukhi ula bynrap “Lada ia kane ka elekshon la jop da ka sain pyrthei kaba khuid, hooid kan bha shibun. Nga kren ia kane ka thain (Khasi-Jaintia), ngam kren ia ka Garo Hills. Hynrei lada ia ka elekshon la jop namar jong ka jingshah thngan ban pynkylla ia ka Reservation Policy, nga ong ha phi ba ka dei ka dak kaba sniew bad wat khuslai namar ma ngi baroh ngin sa ioh khet ia u soh bad nga tharai ngin dang im ban iohi ia u soh ba ngi kheit. Ka kam sain pyrthei ba khuid, hooid nga sngew kala dei ka por ba ki paidbah kim dei shuh ban shim pisa ha ka por elekshon, ka dei kaba bha palat hynrei lada ka long da kumwei pat, ka dei ka dak ba sniew ia ka Jylla”.
Haba kylli, une u MP ula ong ba ha ka khein jingkhein jong u, ka NPP kam shym la rem ia ka elekshon tang namar ka rai jong ka BJP ban ai ka jingkyrshan ba pura ia ka party.
“Ngam ngeit satia. Balei ba nga ia kane ka long namar ha u 2016 ym tang ka BJP ka kyrshan ia ngi bad wat u Myntri ka Tribal Affairs ba mynta ula iaid ialap elekshon bad nga bad u CM ula jop da jan kot 2 lak bad ula thaw record ha Ri-lum Garo” ula bynrap.
 dang shen ha ka elekshon Lok Sabha na Tura bad Shillong seat ka dei namar ka ‘State Reservation Policy” ym namar ba kyrshan ka BJP.){kind=link}