Imphal, Nailar 11: San ngut ki nong Myanmar, ka ba kynthup ia kawei ka kynthei ki la shah kem noh ha Manipur namar ka jingwan rung beain sha u pud u sam jong ka Manipur, ong ka khubor pulit hynnin ka sngi Balang.
Ia kine ki san ngut la kem noh da ki bor pulit ha ka miet sngi ba Ar ba la lah na ka shnong Ngathal ka ba hapoh Churachandpur district.Na ka liang u nongaiktien ki pulit ha Imphal, u la ong ba kine ki nong Myanmar ki la wan rung beain sha ki bynta khappud bad ki shong ki sah ha kawei ka iing hapoh katei ka shnong.
“Kine ki briew kim shym la lah ban pyni ia kino kino ki kot ki sla ba donkam ban pynshisha ia ka jinglong nongshong shnong jong ka ri, kumta na ka liang ki pulit ki la kem noh ia ki. Nalor kata la ujor pyrshah ia kine ki san ngut na ka bynta ban pynlong shuh shuh ia ka jingtohkit,” ong u nongaiktien.
Ki kam khaii briew beain nalor ki kam khaii tuh ia ki ba bun jait ki drok, khamtam u heroin nalor ki dawai kuli methamphetamine ki jur bha napoh Myanmar.Ki kam rungtuh ba khah khah da ki kynhun seng lehnoh bad ki kynhun kieng atiar jong ka thain shatei lammihngi (Northeast) ki ba shong riehtngen ha ki bynta jong ka Myanmar ki la buh ka jingeh ka ba khraw na ka bynta ki bor pahara ka sorkar India.
Ka jaka khappud ba khlem don jingker ka ba ha ka jingjngai ka ba 1,643 km hapdeng ka India bad ka Myanmar ka la kylla long ka lynti khappud ba laitluid, ha ka ba ka leit ka wan na baroh arliang ka long ka ba laitluid ha ka jingjngai ka ba hapoh ka 16 km sha baroh arliang.
