Agartala, Nailar 11 :U National President ka BJP, u JP Nadda un wan poi ha Tripura ha ka jingwan jngoh ba ar sngi ka jong u ia kane ka jylla ha ka 28 tarik mynta u bnai.
Kane ka jingwan jngoh jong u Nadda la shim ba ka dei ka ba kongsan bha hadien ba ka party ka la pynkhreh ban iakhun ia ki artylli ki ilekshon ki ban sa long shen.Khyndiat por hadien ba la dep ka jingleh niam Durga Puja, yn pynlong ia ka ilekshon VC bad hadien hadien kane yn sdang sa ka jingpynkhreh na ka bynta ka ilekshon assembly.Ki tyllong khubor ki la ong ba ha kane ka jingleit jurip u Nadda un ai jingkren ha ka jingialang paidbah ka ban long ha Khumulwng.
Kane ka jingialang paidbah ka jong u ka long ka ba kongsan bha, kata namar la slem bha ka seng BJP ha ka jylla ka don ia ka jingthmu ban pynlong ia ka jingialang paidbah ka ba heh bha ha Khumulwng ha ka jaka jong ka Agartala.
“Ka jingthmu ka long ka ba shai bha, ka BJP ka kwah ban phah ia ka khubor ka ba ia ryngkat bad iasyriem ha ki kam sain hima jong ka thain bad ba kam kwah ban pyndem ha kino kino ki buit bad ki jingbanbor da ki party riewlum kumba ka la leh ha ka ilekshon assembly ha u 2018,” ong u nongialam ka party.
Nalor kane ka rally paidbah, ki don ruh shibun ki mat ki ba iadei bad ki jingtreikam jong ka party ia ki ba u Nadda un ai jingkren ha kane ka jingleit jurip ba ar sngi ka jong u.
Ka tyllong khubor ka ong bad u General Secretary ka party ha ka ri u BL Santosh u la dep ban aiti ia ka kaiphot sha ki nongialam ba hakhliehduh jong ka party ha ka ba iadei bad bad ki jingtreikam jong ka party bad mynta ka ladei ka por ha ka ba u Nadda un ai ka jingpynbna ha ka ba iadei bad ka jingbhah kam thymmai.Namar ba u la wan da lade hi, kumta ruh un khot pynlong ia ki katto katne tylli ki jingialang khnang ban ioh jingshai ha ka ba iadei bad ka jinglong jingman ha ka jylla.
Katto katne ki nongialam ki sngew ba kane ka jingwan jurip jong u Nadda kan pynkhlain shuh shuh ia ka jingtreikam jong ka party ha ki bynta bapher bapher.
