Shillong, Nailar 11: U Myntri Rangbah ka Jylla Conrad Kongkal Sangma hynne ka sngi palei ula ong ba ka Sorkar Jylla kala dep ban pyllait ia palat T. 1000 klur ka pisa sha ki paid Nongrep ka Jylla lyngba ki skhim bapher bapher kynthup ka skhim FOCUS ha kine ki saw snem bala leit noh.
Haba pyntip ba ka FOCUS ka dei ka skhim kaba heh duh kaba la ai jingmyntoi ia kumba 4.5 lak ngut ki nongrep, u Myntri Rangbah ula ong ba ka Sorkar kala sngewthuh ia ka jingkongsan jong kane ka prokram bad kala rai ban ai sa ka jingpynthep pisa beit beit ba mar T. 5000 sha ki longing jong ki paid Nongrep ha ka Jylla lyngba ka FOCUS +.
U Myntri Rangbah ula ong ba lyngba ka skhim FOCUS, jan kot 18000 tylli ki kynhun nongrep lah dep ban thaw ha kylleng ka Jylla bad kin dang don bun ruh ki ban sa thaw thymmai.
Ula bynrap ba haduh 2.5 lak tylli ki longiing jong ki nongrep kila ioh jingmyntoi na kane ka skhim.
U Myntri Rangbah ka Jylla ula ong ba ki paid nongrep ha ka Jylla kila kmen shibun halor kane ka skhim FOCUS, kaba pynlong ia ka sorkar ban pynmih sa ia ka skhim FOCUS+.
Haba kren ha ka jingialang,u Myntri Rangbah ula ong ba ka jingjop jong ka skhim FOCUS bad ka jingioh ia ki jingiaroh na ki nongioh skhim, kala pynlong ia ka Sorkar ban pyllait paidbah sa ia ka FOCUS+ khnang ban lah sam sa ia ka song pisa ba mar T. 5000 ka ban leit beit beit sha ki bank account jong ki.
Haba pynshai ba kane ka song T. 5000 kam dei satia ka jingai ram bad kane ka song pisa ka dei kaba ai kum ka bai thied symbai ban rep, u Myntri Rangbah ula ong ba lyngba ka jingpynlong ia ka Northeast Food Show ba ju pynlong manla u snem ha Shillong, ka Sorkar Jylla kala lah ban pyni nam ia ki mar rep bala pynmih da ki nongrep ka Jylla bad ruh ia ki mar ba pynmih na ki marrep da ki nongsengkam.
Ula ong ba lyngba ki prokram bapher bapher jong ka Sorkar, ki Nongrep bad ki nongsengkam lajong kila lah ban ioh mynta ia ki iew ban pyniaid ia ki mar ki mata la ka dei hapoh ka Ri ne sha ki Ri ka Pyrthei.
Ha ka por ba pyllait paidbah ia ka FOCUS+, u Myntri Rangbah ka Jylla lem bad u Chief Whip ka Sorkar Marcuise Marak lem bad u Nongaibuit u Myntri Rangbah Thomas A Sangma lem bad kiwei kiwei ki MDC, kila aiti ia ka song pisa da ka cheque kaba kot haduh T.22.95 lah sha ki 40 tylli ki kynhun Nongrep.
In Betasing, #SouthWestGaroHills District, joined by over 2500 Farmers, SHGs & Producer Groups to celebrate the success of Meghalaya’s biggest Farmers’ Welfare Program ‘FOCUS’ we distributed cheques worth ₹22.95 Lakhs to 40 Producer Groups@narendramodi @nstomar @AgriGoI pic.twitter.com/3vPf0bi6yf
— Conrad Sangma (@SangmaConrad) August 11, 2022
Ka skhim FOCUS kaba la pyllait paidbah ha u bnai Lber 2021,kala ai jingmyntoi haduh 2.5 lak ngut ki nongrep haduh mynta mynne. La pyllait ia kane ka skhim ban kyntiew ia ki kam rep kam riang.
Lyngba ka FOCUS+, ki longiing kin sa ioh ia ki card FOCUS+ kum ka jingithuh bad yn pynthep ruh ia ka song pisa ba mar T. 5000 kum ka jingmyntoi ba ki ioh. Ki riew shimet ki dei ban register ialade ha ki kynhun nongrep ban ioh ia ka jingmyntoi.
