Dibrugarh, Nailar 11: Ia ka jingialang ka ba kyrkieh halor ka jingiakynad pud hapdeng ka Assam bad ka Arunachal Pradesh la pynlong hynnin ka sngi Balang hapoh Joypur IB ha Naharkatia, Dibrugarh district ka Assam.
Ia ka jingiakren ha ka ba iadei bad ka thain Namsang la pynlong ha kane ka jingialang bad na ka liang ki nongmihkhmat ka Assam bad Arunachal Pradesh ki la pynlong ruh ka jingleit jurip sha kane ka jaka ban bishar bniah ia ka jinglong jingman.
U Myntri ka cabinet ka Arunachal Pradesh, u Wangki Lowang, u MLA ka Borduria u Wanglin Lowagdong, u deputy comissioner ka Tirap u Taro Mize, u ADC ka Deomali bad u DFO ka Deomali ki la iashim bynta ha kane ka jingialang na ka liang ka Arunachal Pradesh.
Katba na ka liang ka Assam la mihkhmat da u MLA ka Naharkatia u Taranga Gogoi, u deputy comissioner ka Dibrugarh u Biswajit Pegu, u SP ka Dibrugarh u Shwetank Mishra, u ADC Biswajit Phukan bad u circle officer ka Naharkatia u Sarat Gogoi.
Ha ba kren sha ki lad pathai khubor, na ka liang u Myntri ka Arunachal u Wangki Lowang u la ong, “Ka la don ka jingiakynad pud hapdeng ka Assam bad ka Arunachal. Hynrei lyngba ka lynti jong ka jingiakren bad iamir jingmut, ia kane ka jingeh yn sa lah ban pynbeit pat.Ngi la kut jingmut ban ia pynbeit ia ka jingiakynad pud da ka jingiasngewthuh jingmut lang.”
Na ka liang u MLA ka Assam, u Taranga Gogoi u la ong, “Ngi la pynlong ka jingleit jurip sha ka thain ka ba don hapdeng ka jingiakynad ha Namsang bad ia ka kaiphot yn sa phah sha u Myntri Rangbah (CM) ka Assam u Himanta Biswa Sarma mynta ka sngi.Ngi sngew thikna ba ha kane ka kynti ka ba mynta ia ka jingeh ka ba iadei bad ka jingiakajia pud hapdeng kine ki ar jylla yn sa lah ban pynbeit noh.”
Dang shen, na ka liang u CM ka Assam, u Himanta Biswa Sarma bad u CM ka Arunachal Pradesh u Pema Khandu ki la ia soi ia ka soskular na ka bynta ban pynkut noh ia ki kam iakynad pud ka ba la neh da ki phew snem hapdeng kine ki ar jylla.Kine ki arngut ki nongialam ki la ia mynjur ruh ban pynduna ha ka ba iadei bad ki katto katne ki shnong ki bym pat don hapdeng ka jingiamynjur sha ka 86 ha ka jaka jong ki 123 tylli.
