Shillong, Jylliew 10: U Symbud Myntri Rangbah Bah Prestone Tynsong hynne ka sngi Nyngkong, ula kyntu ia ka Kong Bindas Syiem ban sangeh noh ia ka jingshah thngan bad ula pynthikna ba ka sorkar jylla kan shimkhia bad ka sorkar pdeng ba kan pyllait noh mardor ia ka T.100 Klur ban shna pynheh ia ka surok kaba 20 Km na Nongpoh shaduh Umden bad kumjuh ban shna ia ka surok kaba 39 Km na Umden shaduh Lum-nongrim.
Katei ka jingkular kala mih hadien ba ka Kong Bindas Syiem, kaba dei ka kmie jong ki 3 ngut ki khun bad kaba shong basah ha Umden, kala jam sha ka sngi kaba 5 jong ka jingshah thngan ban dawa shna noh ia ka surok Nongpoh-Umden-Sonapur, kaba la sniew shaba palat pud.
Haba iakren bad ki nongthoh khubor, u Bah Prestone Tynsong ula iathuh, ba ha u bnai Lber 2024 ka sorkar kala dep ban phah da ka jingthoh sha ka sorkar pdeng lyngba ka North Eastern Council (NEC) sha ka Ministry for Development of the North Eastern Region (DoNER) ban pyllait noh ia ka bhah tyngka ha kaban shna bha bad pynheh ia ka surok kaba 20 Km na Nongpoh sha Umden ha ka jinglut jingsep kaba kot T. 51-52 Klur.
“Ka detailed project report (DPR) ka dang don hapdeng ka jingpynkhreh bad ha kine ki khyndiat sngi, nga ngeit skhem ba ngin sa aiti noh ia ka DPR sha ka tnad Planning bad hadien kane ngin sa phah sha ka NEC bad ka NEC kan sa phah pat sha ka Ministry of DoNER,” ong u Bah Prestone haba bynrap “Ma nga bad u Myntri Rangbah ka jylla ngin leit ban iakynduh ia u Myntri ka DoNER ryngkat bad ki ophisar jong ka Ministry ban pynbor ha ka ban pyllait noh mardor ia ka bhah tyngka jong katei ka project.”
Ula iathuh ba ka sorkar kala phah ia ka jingtyrwa ban pynkylla noh ia ka surok na Nongpoh sha Umden sha ka ‘Intermediate Lane’ ym shuh kum ka ‘Single Lane’ namar ba kila dep ban buh jingkheiñ lypa ia ka jingiaid ki kali ha katei ka thaiñ.
U Bah Prestone Tynsong ula pyntip ruh ba ka skhim ha kaba iadei bad ka wat ka ba-ar jong ka projek na Umden shaduh Lum-nongrim (39 Km), kan iasohlang bad ka National Highway shaduh Byrnihat, bad ka dei kaba lah dep ban kynthup ha ka PMGSY-III ha ka jinglut jingsep kaba kot T.50-51 Klur.
“Ka jinglut jingsep na ka bynta kitei ki artylli ki projek kan kynjoh sha ka T.100 Klur. Nga ngeit skhem ba kitei ki surok kin iarap ia kitei ki shnong kiba don naduh na Nongpoh, Umden shaduh Lum-nongrim” ong u Symbud Myntri Rangbah ka jylla.
“Da katei ka jingpynshai, nga kwah ban kyrpad ia I Kong Bindas Syiem ban sangeh noh iaka jingshah thngan ka jongi ha kaba iadei bad ka jingiakhun ban maramot bad ban shna bha ia katei ka surok khamtam haba nga la dep ban pynshai ia ka jinglong jingman” ong u Bah Prestone.
“Ha ka jingshisha nga la khot ia I ban wan iakynduh ia nga hynrei im shym la lah ban wan iakynduh ia nga hynrei lada jia ba im hun ia ka jingpynshai ka jong nga, ka jingkhang ka jong nga ka plie ban iakynduh ia nga ha kano kano ka por ba I kwah ban iakynduh. Hynrei na ka liang ka jong ka sorkar bad ka tnad, nga kyrpad biang lyngba ka jong phi ia I Kong Syiem ban ym bteng shuh ia ka jingshah jingit ne jingshah thngan” ong u Bah Prestone.
Ula pyntip ruh ba dang ha kine ki sngi, ula dep bthah ia ki bor pyniaid district ryngkat bad ia u Executive Engineer ban leit iakynduh markhmat ia ka Kong Bindas Syiem ban pynshai bad pynsngewthuh ia ka jinglong jingman ha kaba iadei bad katei ka projek hynrei wat hapdeng jong katei haduh kane ka khyllipmat kaba mynta ka dang bteng ia ka jingiakhih ka jongka da kaba shong shah thngan.
U Symbud Myntri Rangbah ula iathuh ba ia katei ka projek la pynwandur la slem bha ha kaba u MLA bad MDC ka Nongpoh constituency bad kiwei kiwei ki nongialam na Umden bad Marmain Area kila wan ban iakynduh ia u 3-4 sien ban kyrpad ban maramot noh ia katei ka surok kaba la sniew shaba palat pud.
“Ha ka jingshisha ha ka jingsynshar ka sorkar MDA-1, ngi lah dep ban pynrung ha ka thup kaba kongsan jong ka World Bank, hynrei namar ba ka jinglut jingsep kala long palat ia kaba la buh da ka World Bank, ngim shym la lah ban pyniaid shakhmat ia katei ka projek” la ong u Bah Prestone.
