La dei ïa ka District Council ban pynkylla ïa ki kyndon ki Town Committee
Nongstoiñ, Nailar 10: Ka jingeh kaba hakhmat eh ban wanrah ïa kino kino ki kam pynroi hapoh jong ka sor Nongstoiñ, ka dei namar ka jingbym don ïa ka Nongstoiñ Town Committee kaba kot bor. Namar ban wanrah ïa kino kino ki skhim kiba heh na ka sorkar pdeng, donkam ïa kata ka Town Committee kaba pura lane kata ‘Full Fledged Town Committee’.
Ka Nongstoiñ Town Committee, ka dei kaba la slem bha napdeng ki Town Committee kiba don ha ka Jylla. Hynrei haduh mynta ka dei tang ka Committee ba shu ïa shong jingïalang, ïa pyni nia bad kut ha ka ïa jingdih sha. Ka daw ka dei ka jingbym don bor ei ei ban wanrah ïa kita ki project bapher bapher na ka sorkar kmie, namar ba ka dei tang kata ka Adhoc Committee.
Ha kiba bun ba lang khamtam ki samla kiba angnud ïa ka jingpynroi, ki kylli ba balei ki Sordar shnong ryngkat bad ki bor District kim lah ban thaw ïa kata ka Town Committee ba pura ?..
Katkum ki kyndon ba la pruid dak na ka bynta ban thaw ïa ka Committee ba pura, la kren shai ba ym shah ïa kino kino ki dkhot jong ka Committee ban long ki shakri sorkar. Hynrei la shah tang ïa kiba laitluid kata la ki dei ki nongsynshar ne kiwei pat ki riew shemphang, ba kin long ki dkhot ka Committee.
Ki don katto katne ki nongsynshar shnong kiba la pynpaw ba kim da sngew ïahap than halor ki kyndon ba yn ym shah ïa ki sordar kiba treikam sorkar, ban long ki dkhot ka Town Committee. Ki don ruh napdeng ki sordar kiba la pynpaw ba hangno shuh yn pynshong ïa ka kyrdan jong ki kum ki Sordar, lada yn thaw noh ïa ka Committee ba pura.
Dei halor kine ki nongrim, ba kane ka Adhoc Town Committee kam sngew ïahap ban kyntiew sha ka ‘Full Fledged Town Committee’, watla la hap ban duh noh ïa ka roi ka par bad ki lad jingmyntoi na ka bynta ki paidbah nongshong shnong jong ka sor Nongstoiñ baroh kawei.
Uwei na ki dkhot barim ka Nongstoiñ Town Committee, u ba long ruh u MDC barim jong ka Nongstoiñ u Bah N.Nongdkhar, ha ka jingïakren bad u nongthoh khubor, u la pynpaw ba katkum ka jinglong jingman kaba mynta, la i donkam palat ban kyntiew kyrdan noh ïa kane ka Town Committee sha ka Committee kaba pura. Namar tang ka Town Committee kaba pura, kaba lah ban wanrah ïa ki lad pynroi na ka sorkar pdeng, kumba la pynkup bor da ka Constitution jong ka ri India lyngba ka Sixth Schedule.
U la ong ruh ba kawei na ki mat kiba kham kongsan eh ba donkam ban pynkylla, ka long ba ka District Council ka dei ban pynbeit thymmai noh ïa ki katto katne ki kyndon treikam jong ki Town Committee, kaba ïa hap dur bad kane ka juk kaba mynta.
Ha ka jingïadei bad u nongsynshar shnong u ba treikam sorkar, u lah ban long u sordar shnong u ban peit ïa ka synshar khaddar hapoh ka shnong. Hynrei um lah shuh pat ban long dkhot sha ka Town Committee. Kumta dei ban ailad ïa ki paidbah nongshong shnong ba kin jied hi da uwei pat u nongmihkhmat u ban mihkhmat sha ka Town Committee.
Kawei pat na ki mat ba donkam pynkylla da ka District Council, ka long na ka bynta ka rukom jied bad ki nongjied ïa ki nongmihkhmat sha ka Town Committee. Katkum ka chapter 3 section 18 sub section (a) jong ka riti treikam ki Town Committee, ka ong ba uno uno u nongshong shnong ka ri India u ba la sah palat ïa ka 180 sngi ha kano kano ka shnong kaba hap hapoh ka Town Committee, u lah ban ïashimbynta ha kaba thep vote ban jied ïa ki nongmihkhmat.
Hynrei, u Bah Nongdkhar u la ong ba kane ka shong ha ka jingstad jong ka District Council ban pynbeit thymmai ïa kiba kum kine ki kyndon bad kiwei kiwei ruh lada i donkam, khnang ba ki paidbah kiba shong hapoh ka Town Committee kin ym sngew artatien.
Kaei kaba lah ban kdew hangne ka long ba, lada la kyntiew kyrdan noh ïa ka Nongstoiñ Town Committee sha ka kyrdan ba pura, ki paidbah Nongstoiñ kin ïoh nong arshah. Kawei ka lad pynroi ba la shim jingkitkhlieh da u MLA bad kawei pat ka dei kaba la kit khlieh da ka Town Committee, ban wanrah ïa ki skhim na ka sorkar pdeng bad na ka sorkar Jylla.
Ban pynurlong ïa kine ki lad jingpynroi, ka shong ruh ha ka jingstad jong ki paidbah ba ki dei ban nang ban jied ïa kita ki dkhot kiba lah ban saiñdur bad ïa mir jingmut halor ki kam pynroi.
