Shillong, Nailar 10 : Haduh phra tylli ki jylla kiba na ka thain shatei lam mihngi jong ka Ri kin sa wan ban shim bynta ha ka North East Olympic Games kaban long ha ka jylla Meghalaya naduh ka 30tarik u Risaw haduh ka 06tarik u Naiwieng.
Ha katei ka Olympic Games na ka liang ka Organising Committee ka la pynbeit ruh ba kin don haduh 18 tylli ki jingialehkai kiban pynrung.
Katkum ka jingiathuh da u Myntri ka tnad Sports and Youth Affairs ka sorkar jylla, Bah Banteidor Lyngdoh kin don haduh 3000 tam ki nongïalehkai na kitei ki phra tylli ki ki ban wan ban ia knieh ia ka nam lahduh ha ki lympung ialehkai bapher bapher.
“Na ka liang ka sorkar jylla mynta la shisnem ngi la pynkhreh na ka bynta kane ka jingiakob kaba heh tam ka ban long ha ka jylla ka ban pynphuh shuh shuh ia ka jingrakhe ia ka jingdap 50 snem ka jingioh la ka jong ka jylla,” ong u Bah Banteidor haba kren bad ki lad pathai khubor.
U Working President ka Meghalaya State Olympic Bah John F Kharshiing u la iathuh ba kiba bun ki jingialehkai jong kane ka Games kan long ha SAI NEHU bad katto katne tylli pat shabar jong ka.
