Shillong, Jylliew 03 : Ka Overseas Nursing Job Fair bala pynlong mynshem snem kala kylla long ka kabu ia ki 27 ngut ki Nos na Meghalaya kiba la pynkhreh ban sdang noh ia ka jingai jingshakri ha Japan hadien ba kila pyndep ia ka jinghikai pyntbit ban kren Japanese.
Da kane ka sap ba thymmai, kine ki nos kin sa leit mynta ban ai ka jingshakri ha kylleng ki hospital bad ki jaka sumar bapher bapher ha Japan.
Kum shibynta na ka “Skill Meghalaya’Scheme, ka Sorkar Meghalaya kala bei tyngka haduh T.50,000 ia u/kawei na ki kyrtong lyngba ka Meghalaya State Skill Development Society (MSSDS). Kane ka jingkyrshan ka thmu ban kdup ia palat 300 ngut ki nos ha kine ki snem ban dang wan.
U Myntri Rangbah ka Jylla Conrad k Sangma ula iakynduh ia ki Nonghikai bad ki samla pule kiba iadon bynta ha kane ka jinghikai pyntbit. Ula pynpaw ia ka jingsarong bad ong “Ka long ka burom kaba khraw ban iohi ba ki nos na Jylla (Meghalaya) kila mih bad ai ka jingshakri sha ki Ri jong ka pyrthei. Ngi la phah ia ki ryngkat ka kyrkhu kyrdoh bad kyrmen ban ioh sngew ia ki khana ba bha shaphang jong ki. Nga kyrpad ruh ia kiwei ba kin wan shakhmat bad shim ia kane ka kabu ym tang ban tip ne nang ban kamai shabar ka Ri hynrei, ban pyniar ia ka jingnang jingtip bad ka jingtrei kam”.
Ka “Skill Meghalaya” kaba ai ia kum kane ka jinghikai, ka dei kaba thmu ban pynkupbor ia ki samla da ki sap ki phong ba donkam. Ka prokram, bala pynlong da ka MSSDS bad ka Tnad ka Koit ka Khiah, haba iatreilang bad ki kompani bapher bapher, ka ai ia ki jinghikai ban kren bad nang ia ki ktien ki thylliej jong kiwei pat ki Ri nalor ka lad ban iohkam shabar.
Haduh 27 ngut ki nos kila register bad ka NAVIS ban ioh ia ka jinghikai halor ka ktien ka thylliej bad ka kolshor kaba la long ha Bengaluru. Napdeng kine, 25 ngut kila pass ia ka N4 bad N5 exam ha ka sien iakhun ba nyngjong bad mynta kine kila ioh ia ka jingtyrwa iohkam. San ngut ki nos kila dep ioh ia ka visa bad 2 ngut kila leit sha Japan ha ka 27 tarik Jymmang, 2024 katba kiwei ki dang ap ia ki visa.
14 ngut ki nos kila don iohkam ha ki jaka sumar bapher bapher ha Singapore bad kine kin sa leit sdang ia ka kam hapoh ka 3 bnai.
Ia ka jinghikai la pyniaid da ki 10 ngut ki nonghikai Japanese ha NAVIS. Wat hapdeng ki jingeh ban hikai ia ka ktien thymmai, ki samla pule kila durut bad shim kum ka lad ka ban ai jingmyntoi.
Lah ban kdew hangne, ka Sorkar Jylla kala iasoi MoU bad saw tylli ki kompani ba kynthup ia ka NAVIS, ki ban ai jinghikai bad pynrungkam ia ki samla ka Jylla sha ki Ri bapher bapher ba kynthup ia ka Japan, UK, Singapore bad UAE.
. Kane ka jingkyrshan ka thmu ban kdup ia palat 300 ngut ki nos ha kine ki snem ban dang wan.){kind=link}