Shillong, Jylliew 02: U Myntri ka Tnad Revenue & Disaster Management Bah Kyrmen Shylla, ula kyntu ia ki nongshong shnong ka Jylla khamtam ha ki jaka nongkyndong, ba kin kiar noh naka jingshna Iing ha ki jaka ba long riat bad ban da peit thuh bha shuwa ia ki jaka shuwa ban tei ia kino kino ki jingjia.
U Myntri ula kynthoh ia kane ha ka jingleit jurip ia ka jingtwa khyndew ha ka shnong Nongpriang, ka shnong kaba don ha shiteng riat jong ka thain Sohra, kaba hap hapoh ka Sohra Civil Sub Division, ha ka sngi Saitjain.
Kat kum ka jingong jong u, ka Jylla Meghalaya ka dei kaba ioh jur eh ia u slap bad ka dei ruh ka jaka kaba hap hapoh ka Seismic Zone V, ka jaka kaba jur bha u jumai.
“Kumta ka long kaba donkam ia ki nongshonghsnong ban long kiba phikir, ban bishar bniah iaka jinglong jingman ki jaka, kilum, ki wah hashuwa ban shna Iing” ula ong.
Haba kren halor ka Nongpriang, u Myntri ula ong “Ka shnong ka don ha Them Riat … nga kyrpad iaki nongshong shnong Nongpriang ba ha ki sngi ban dang wan, lada ki thmu ban shna ing lyngba ka skhim PMAY ne kano kano ruh, ki dei ban shna bha bad peitthuh ia ka jinglong ki jaka khnang ba kum kine ki jingjia hadien habud kin nym jia shuh”.
U Bah Kyrmen ula ong baka jingwan pynjulor ka bor mariang, kam dei kaba lah ban iathuh ne tip lypa hynrei kadei kaba lah ban jia ha kano kano ka por bad ha kano kano ka jaka, namar kata donkam ban phikir ban lait naka jingmynsaw.
Haba kylli halor ka jingiarap ban shna biang ia 2 tylli ki iing ba shah pynjulor, u Myntri ula ong “Kum ka tnad kala don ia ki kyndon bad kala pynpoi iaki lad jingiarap katba lah. Ka tnat kala pynpoi ruh iaka song pisa shaki DC jong ki District ban leh iaka ba donkam”.
