Dibrugarh, Jymmang 28: Ki pulit jong ka Margherita kila leit khynra ia ka iingsah jongu nongkhaii dewiong u Ron Lungsang bad kila ioh kurup T.2 Klur 99 lak na ka iingsah ka jongu.
Ki pulit kim shym la ioh kem pat ia u Ron Lungsang namar ula ioh ban phet krad noh na katei ka jaka.
Hadien ba ki pulit kila ioh ia ki jingtip halor ka jingdonkti ka jongu ha ki kam tih dewiong be-aiñ, ka kynhun jong ki pulit na Margherita Police Station kala sdang ia ka jingkhynra bad kala ioh kurup T.2 Klur 99 Lak na ka iingsah jongu Ron Lungsang.
La suba jur ba une u nongkhaii dewiong udei uba donkti halor ka jingiap jong ki 3 ngut ki nongbylla tih dewiong kiba la shah taplup hapoh ka par dewiong kaba don ha Lidu Tikok, West Mining.
Ki tyllong khubor kila iathuh ruh ba u Ron Lungsang ula donkti ha kiba bun ki kam tih dewiong thliew khnai be-aiñ ha Patkai Hills bad ula pyndonkam da ki nongbylla kiba duk, ba kin trei ia katei ka kam ha ki par dewiong kiba be-aiñ.
La iathuh ruh ba ki pulit ki dang pynlong iaka jingthwet kaba jur ban iohkem ia u Ron Lungsang.
Ha ka sngi u Blei, 3 ngut ki nongbylla tih dewiong kiba la tip kum u Dawa Sherpa uba na ri Nepal bad arngut kiba na ka jylla Meghalaya kiba kynthup ia u John bad Fenaal kila sahkut hapoh ka krem dewiong thliew khnai katba ki dang tih dewiong.
Katei ka jingjia kala jia ha ka por 12.30 mynstep kala don ka jingtwa khyndew bad kitei ki nongbylla kila shah taplup hapoh jong katei ka par dewiong thliew khnai bad la suba jur ruh ba kiei ki nongbylla kila khlad noh hapoh jong katei ka par dewiong.
