Shillong, Jymmang 27 : U Deputy Commissioner ka East Jaintia Hills District, Khliehriat, ula kyntu ia baroh ki samla pule ba kin pyndep noh ia ka jingleh aadhaar khnang ba kin lah ban ioh ia ki jingmyntoi na ki skhim scholarship bapher bapher lyngba ka National Scholarship Portal (NSP).
Une u Khliehduh ka District ula ong ba dei ban pyndep noh ia ka jingpynrung kyrteng aadhaar hashuwa ka jingplie ia ka NSP portal ban ioh apali ia ki scholarship skhim bapher bapher.
Hadien ba ioh ia ka aadhaar card, ki nongaplai ki dei ban pyniasoh ia ka aadhaar card bad ki bank account lajong khnang ba ka pisa ba ioh na ka scholarship kan poi sha ka bank.
Ula pyntip ruh ba kat kum ki kyndon thymmai jong ka scholarship bad ka jingpynbna ka Sorkar, haba iadei bad ka Income Certificate, tang ki Income Certificate bala ai da ki Deputy Commissioner jong baroh ki District, Sub Divisonal Officer jong ki Sub Division bad ki Block Development Officer jong ki Block, yn pdiang haba aplai ia ka scholarship.
La pyntip ba yn ym pdiang shuh ia kino kino ki certificate bala ai da ki bor bapher bapher lane lyngba ka affidavit.
