Shillong, Jymmang 20 : Ka jingiathep vote jong ka Phase-V ka elekshon Lok Sabha kala iaid shaid shaid ha ki 49 tylli ki Parliamentary constituency ha ki 6 tylli ki Jylla bad 2 tylli ki Union Territories ka Ri.
Kine ki kynthup ia 14 seat ha Uttar Pradesh, 13 seat ha Maharashtra, 7 ha West Bengal, mar 5 ha Odisha bad Bihar, 3 ha Jharkhand bad mar kawei ha Jammu & Kashimir bad Ladakh.
Ka jingiathep vote kala iaid ruh ha Odisha kaba dei jong ka phase-II ka elekshon MLA na ka bynta ki 35 tylli ki constituency.
Kat haduh ka por 10 baje mynstep, ka jingpoi ki nongthep vote kala kot haduh 10.28%. Ka Bihar kala kot 8.86%, ka Jammu & Kashmir kakot 7.63%, ka Jharkhand ka kot 11.68%, ka Ladakh ka kot 10.51%, ka Maharashtra ka kot 6.33%, ka Odisha ka kot 6.87%, ka Uttar Pradesh ka kot 12.89% bad ha West Benga kala kot haduh 15.35%.
Hynrei 695 ngut ki kyrtong kila iakhun ha kine ki 49 tylli ki constituenc bad na ki kyrtong kiba pawkhmat bha ki kynthup ia ki Nongialam ka BJP bad Myntri Sorkar Rajnath Singh, u Piyush Goyal, Smriti Irani, katba ki Nongialam ka Congress ki kynthup ia u Rahul Gandhi, KL Sharma, Omar Obdullah jong ka National Conference bad u Chirang Paswan jong ka LJP.
Kat haduh mynta, haduh 379 tylli ki Parliamentary constituency ha ki 23 tylli ki Jylla bad ki Union Territories kila dep ban iathep vote. Ka jingpoi ki nongthep vote lada khein baroh lang kala kot ia ka 67%.
