Shillong, Jymmang 18: U Myntri Rangbah ka Jylla Conrad K Sangma hynne ka sngi Saitjain, ula pyntip ba ka Sorkar kala ithuh kumba 25 acre ka jaka ban pyntrei ia ki jingtei bapher bapher ki ban pynkup dur thymmai ia ka Nongbah Shillong kata ban pynitynnad bad pynkylluid ia ka.
Ha ka jingsynran lang ki heh Ophisar ka PWD, Urban Affairs, bad Forest and Environment, u Myntri Rangbah Ula leit jurip ia ka Ophisar ka PWD, Phan Nonglait Park, Brightwell Bunglow kaba don ha Barik Point, Anjalee Point bad Polo.
“Ka Sorkar ka thmu ban shna ia ki lynti iaid kjat ba thymmai, ki green park, bad ki jaka pynbyrngia ban nang pynlong ia ka Shillong kaba khring bad ai khambun ki jaka paidbah sha ki nongshong shnong” ula ong haba pynpaw ba yn sa thaw ruh ia ki museum bad kiwei ki cultural centre ban pyni ia ka kolshor ba riewspah bad ki jingtei barim jong ka Meghalaya.
Ula iathuh ba ha Barik Point yn sa tei ia ka jingtei sahnam kynthup ka jingpynieng ia ka jaka pynher ia ka Lama ka Ri, kaba lah ban iohi na kylleng ki jaka jong ka Nongbah.
U Myntri Rangbah ula pyntip ba ki jaka ba lait ruh yn sa pyndonkam ban shna ia ki jaka paidbah kum ki restaurant, ki jaka pynieng kali bad kiwei kiwei ki jingdonkam ki ba lah ban pyndonkam da ki trai shnong bad ki nongwankai.
“Ka project kan sdang da ka jingpynkynriah ia ka Ophis ba don mynta ha Barik Point ha u Naitung, bad yn bud da ka jingtei ba thymmai ka ban sdang ha u Nailar.
Halor ka jingiada ia ki dieng ha kylleng ki jaka ki ban mih ki jingtei thymmai, Ula ong “Ngin shimkhia bha ban pynthikna ha kaban nym pom ia ki dieng haba pyntrei ia kine ki jingtei thymmai”.
Haba kren halor ka jingkhapngiah ki surok ha Shillong, u Myntri Rangbah Ula ong ba kine ki sienjam ba thmu ban shim kin kynthup ruh ia ka jingshna ia ki parking lot ba thymmai ha ki jaka ba I donkam.
“Kane ka sienjam ka dei kaba shim da ka jingthmu ban pynduna ia ka jingpynieng kali harud surok, ka ban pynkylluid ia ki kali ba kin iaid. Ka surok thymmai ka ban iaid lyngba ka NEFA Secretariat sha Military Hospital ruh yn sa shna ban pynduna ia ka jingkhapngiah ha Anjalee Point, kawei na ki jaka ba khapngiah bha ha Nongbah” Ula ong.
Ha ka jingjurip, Ula bthah ia ka Tnad Forest and Environment ban pynkynriah noh ia ki mrad na Phan Nonglait Park sha ka State Zoo ba dang shu tei thymmai ha Ri-Bhoo District.
U Myntri Rangbah ula leit jurip ruh ia ka jingtrei ba dang iaid jong ka Integrated Market ha Polo.
