Nongstoiñ, Jymmang 15: Ka State Council of Science Technology and Environment (SCSTE) Meghalaya, ha ka sngi balang ka la pynlong ïa ka jingai jinghikai ïa ki khynnah skul kiba la shong ïa ka Class XII, kaba long ruh kum shi bynta ba kin tip kumno ban pynkhreh ïalade haba leit thoh ïa ki exam JEE bad ka exam NEET.
Ha kane ka prokram kaba la pynlong ha Vanni’s Hall St.Peters Pyndengrei Nongstoiñ, ki la don kumba 40 ngut ei ei ki khynnah kynthei bad shynrang kiba la shong class XII science, kiba la wan ban ïashimbynta na ki skul bapher bapher jong ka West Khasi Hills District kynthup ruh na ki kolej.
Ïa katei ka project la tip ruh kum ka Meghalaya Star 30 bad la ong ba ka jingmut ka long, ba lyngba katei ka jingai jinghikai na baroh kawei ka jylla Meghalaya, yn jied tang 30 ngut kiba kynsai tam na ka bynta ka JEE (Joint Entrance Exam) bad 30 ngut na ka bynta ka NEET (National Eligibility cum Entrance Test).
Ha kane ka sngi u Dr. Varun Murthy Rebuild India Foundation na Bangalore u ba dei u nonglamkhmat ïa katei ka project u la wan ban ai jinghikai ïa ki khynnah.
Na ka liang ka samla Sngewhun shisha Nongrum class XII na Sibsingh Memorial Government Higher Secondary School Nongpyndeng bad u Name Bankhraw Lyngkhoi class XII Anderson Higher Secondary School Nongstoiñ, ki la pynpaw ba ki la ïoh jingmyntoi shibun lyngba ki jinghikai u Dr. Varun, ha kaba ki la ïoh mynsiem ban sngew shlur namar ki la sngewthuh kumno ban pynkhreh ïa kitei ki exam.
Ha kane ka sngi la ïadonlang ruh ki nonghikai na ki skul bapher bapher bad la pynïaid ïa katei ka jingïalang da u bah Remi Pyngrope, state council of science technology and environment.
