Shillong, Jymmang 14 : U Myntri ka Tnad Social Welfare Bah Paul Lyngdoh ha ka sngi Ba-ar, ula kynnoh ba ka jingkiew jong ki kam thombor pyrshah ia ki Kynthei ka dei namar ka jingjur ka jingpyndonkam bakla ia ka Social Media bad ka jingbym biang ha ka Information Technology (IT) Policy jong ka Ri.
Haba iakren bad ki nongthoh khubor, u Bah Paul ula ong “Kane ka dei ka jingiaid ka juk ia kaba lah ban kynnoh ia ka jingkylla ha ka jinglong jong ki briew bad ka jingiohi ia kiwei pat ki para briew khamtam haba jur ka jingpyndonkam bakla ia ka social media”.
“Phin iohi ba lada ma phi bad ma nga ngi dei ban iakren, ngin pyndonkam ia ki ktien kiba don akor hynrei shisien ba ngi iakren na ki social media, ngan pyndonkam ia ki kyntien ki bym sngewtynnad satia”.
Haba kynnoh ruh ia ka IT Policy jong ka Ri, u Myntri ula ong “Ki don shibun ki jingbym biang ha ka IT Policy bala pyntreikam ha kane ka Ri, ta ka daw ki briew kila ioh rung katba mon ia ki website, kiba pynshlur ban nym burom satia ia ki kynthei, kren khlem akor ia ki bad ktah kti ruh ia ki”.
“Ka dei ka kam kaba pynkhuslai bha hynrei ka ain hi marwei kan nym lah ban leh eiei ia kane. Ka donkam ban hap pynsngewthuh ha ki kyrdan bapher bapher bad kane ka long kaba kongsan bha bad kaba hap ban sdang na ki Shnong ki Thaw bad ka hap ban mih na ki Nongialam Niam, kiba khmih iala ki riewngeit” ula bynrap.
