Shillong, Jymmang 02: U Myntri Rangbah ka Jylla Conrad K Sangma hynne ka sngi palei, ula lum ia ka jingialang bishar kam bad ki Heh ka Tnad Forest & Environment, ban shim jingkhein halor ka jingiaid ka kam ba iadei bad ka jingshna ia ka Meghalaya State Zoo.
Ka Meghalaya State Zoo ka dei kaba la shna ha ka shnong Umtrew, Ri-Bhoi District bad la shna ia ka ha ka jaka kaba heh haduh 72 hectare.
Ki Ophisar kila pyntip ia u Myntri Rangbah ba ki jingtei kila jan dep artad bad ka Zoo kan sa treikam noh shen. Kila pyntip ruh halor ki sienjam bala shim da ka Tnad ban buh ia ki jingdonkam na ka bynta ki nongwankai khamtam ki Khynnah kynthup ruh ka Interpretation Centre.
U Myntri Rangbah ula ong “Ka Zoo ka dei ban lah khring ia ki nongshangkai pyrthei bad ki nongleit kai kiba kwah ban sngewthuh ia ka jingriewspah ka mei mariang ka Jylla. Ka dei ban long kum ka jaka ban ioh jinghikai, ban sam jingtip bad ban pynbyrngia”.
Ula ai jingmut ruh ia ki Ophisar ba katba ka Tnad ka dei ban peit bad sumar ia ka Zoo, ka jingpyniaid ba manla ka dei ka dei ia kaban ai pyniaid sha ki briew kiba shemphang, kiba lah ban pyniaid ia ka jingot ticket, pynbeit kali, pyniaid ia ki restaurant bad kiwei kiwei ban pynsuk ia ki nongwankai.
