Shillong, Jymmang 02: U Myntri Rangbah ka jylla u Conrad K. Sangma ula lum ia ka jingialang bad ka tnad Information and Communication hynne ka sngi Palei ban iakren halor ki kam kiba iadei bad ka jingthmu ban pynbiang ia ka Internet ha ki jaka kiba don ha kyndon tam ha ka jylla.
Ki ophisar kila pyntip ba ha ka wat kaba nyngkong, la dep ban ithuh ia ki 30 tylli ki jaka kiba don ha kyndon tam ban pynthikna ba kin ioh ia ka Internet. Kila pyntip ruh ha u Myntri Rangbah ha kaba iadei bad ka jingiaid shakhmat jong ka kam na ka bynta ban pynbha bad kyntiew ia ka State Wide Area Network (MSWAN), kaban ai ka jingshakri ha kaba iadei bad ka e-Gov processing.
Lyngba katei ka projek, baroh ki District Headquarter, Sub-Division Headquarter, bad Block Headquarter ha kylleng ka Meghalaya kan don noh ka jingpyniasoh lang.
Kumban shu kdew kumba ka long mynta, ka jingdawa ia ka Internet bandwidth kadei 39,130 TB/Bnai ha ka 15.5 Gbps, katba ka jingbuh lypa ia ka jingdon ka jingdawa ha ki 5 snem ban wan kan kynjoh sha ka 4-5 lakh TB/Bnai ha ka 200 Gbps bad ka tnad ka dang treikam ban lah ban pynurlong ia kane ka jingdawa.
Ki ophisar kila pyntip ruh ha u Myntri Rangbah ba ka tnad ka dang treikam shaid shaid ban pynlong ia ka nongbah Shillong kum ka International Internet Hub.
Kila pynpaw ruh ha u Myntri Rangbah na ka bynta ban pynbiang ia ka Wi-Fi kaba shngain bad kaba lait na kano kano ka jingthud ha ka Main bad Additional Secretariat.
Ha katei ka jingialang, la iakren ruh ia ki jingdonkam na ka bynta ban don iaka Meghalaya Tech Parks Society bad kiwei pat ki IT bad ki jingai jingshakri lyngba ka IT. Kila pyntip ruh ba ia ka Work Order na ka bynta ka Tura Tech Park la dep ban ai bad ia kane ka project la khmih lynti ban pyndep ha u Lber 2026.
