Shillong, Jymmang 02: Ka Jylla Meghalaya kala iatehlok bad ka UNICEF ban iatreilang ha kaban pynkhlain shuh shuh ia ka prokram Early Childhood Development Mission hapoh ka Jylla ne ka mishon ban pynthikna ia ka jingheh jingsan hapdeng ka koit ka khiah jong ki Khunlung naduh ba ki dang hakpoh ka Kmie.
U Myntri Rangbah ka Jylla Conrad K Sangma ula lum ia ka jingialang bad ki Nongmihkhmat ka UNICEF ba ialam da ka Dr Madhulika Jonathan kaba dei ka Chief of Field Office Assam bad North East States.
Kane ka jingialang ka dei kaba la pynlong hynne ka sngi Palei, ban batai ia ki sienjam bala shim da ka Jylla ha kaban iatreilang bad ka UNICEF ban pynkhlain ia kane ka prokram.
Haba pynpaw ia ka jingkwah ban iatreilang bad ka Sorkar Meghalaya, ka kynhun ka UNICEF kala kular ban ai ia ka jing kyrshan ia ka Early Childhood Development Mission jong ka Jylla.
Haba ithuh ia ka bynta ba kongsan jong ki Nongtrei ka Integrated Child Development Service (ICDS) ha kane ka mishon, ka kynhun ka UNICEF kala kdew ia ka jingdonkam ban pynlong ia ki prokram ai jinghikai halor ka rukom sumar sukher ia ki khunlung naduh ba dang kha bad ka jingai jinghikai ia ki.
Ka kynhun ka UNICEF kala air uh ka jingkyrshan ba pura ia ka Sorkar ha kaban nang kyntiew ia ka Child Risk Impact Analysis (CRIA). Kane ka dei ka sienjam ban lah ithuh ia ki kam kiba dei ban ai jingkyrshan bad ban ai ioh aijingmut ruh ia ki district ba kin pynkhlain ia ka jingai jingshakri na ka bynta ki khunlung khynnah.
