Shillong, Iaiong 24: U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem, ula kular ban sa thoh shithi mardor shaki bor ka North Eastern Indira Gandhi Regional Institute of Health and Medical Sciences (NEIGRIHMS) halor ka rai jong ka Council ban nym ai trading license ia u contractor bala ai kam da ka Institute katkum ka Trading by Non-Tribal Regulation 1954.
U CEM ula ai ia kane ka jingkular shaki nongialam ka Khun Hynniewtrep National Awakening Movement (KHNAM) kiba leit ban kynduh ia u hynne ka janmiet.
Haba kren sha ki lad pathai khubor u Working President ka KHNAM Bah Thomas Passah ula ong ba kane ka jingdawa ka dei katkum ka section 3(A)(e) jong ka Trading by Non-Tribal Regulation, 1954 kaba la kdew ba “Ka jingdon ki nongkhaii bar Jylla kala tam palat ia u pud bala buh da ka Executive Committee kat kum ki kyndon bad ki rules”.
“Katkum ka Section jong ka trading by non-tribal regulation, u bar Jylla ba pyntrei ha NEIGRIHMS u dei ban ioh trading license. Ngi la kyntu ia u CEM ban thoh shaka NEIGRIHMS ban pynshai ba katkum ki rules ka KHADC kam lah ban ai trading licenses namar ki don ki trai Jylla kiba lah ban trei ia kane ka juh ka kam. Kam iahap ban pynduh kam iaki trai Jylla hala ka jong ka Jylla. Ngi iai dawa ba ki Khasi ki dei ban ioh iaka kam Contract namar ka long kaba eh ban ioh kam Contract shabar Jylla” ula ong.
“Ngi iaroh ia u CEM uba la kular ban shimkhia ia kane daka ban thoh sha u deputy director ka NEIGRIHMS baka KHADC kam lah ban ai trading license ia u Singhania, uba la ioh kam Contract ha NEIGRIHMS” ula ong.
U Bah Thomas ula iathuh ba ka KHNAM kala dep kynduh ia u Deputy Director (Admin) ka NEIGRIHMS haka taiew bala dep hadien bala ioh jingtip baka la ai kam contract ia u bar Jylla uba khlem pat ioh trading license naka KHADC.
“U Deputy Director ula iathuh ba iaka kam la aiti ha u Singhania daka ba bthah ruh ba udei ban pynbiang iaka trading license naka district council” ula ong.
U Bah Thomas ula kynnoh ruh ba une u contractor ula pyrshang ban behkam iaki trai Jylla bad halor kane ka seng kan ym lah ban pdiang satia.
“Ngi la rai ban long kiba peitngor ia kum kine ki briew kiba wan sha kane ka Jylla ban khaii beain. Ngi kyntu ruh iaki paidbah ban pyntip shaka Seng lada don kum kine ki briew kiba wan khaii beain naka bynta ban iada iaka kamai kajih ki trai Jylla” ula ong.
