Shillong, Iaiong 24 : Ka Meghalaya Power Generation Corporation Limited (MePGCL) kala pyntip ba ka jingshna pynkhlain bad jingmaramot ia ka jingkieng Umiam,kaba dang iaid shaid shaid mynta, la khmih lynti ban lah pyndep noh hapoh u bnai Jylliew 2024.
Ka MePGCL kala pynbna ruh ia ka jingpyrrkhing ba thymmai ban shah iaid kali halor jong kane ka jingkieng haba pyntip ba naduh mynta kat haduh ka 30 tarik u Jylliew, ki kali kiba lah ban iaid na kane ka jingkieng kin dei tang kiba khia hapoh ka 4 metric ton.
Ka pyntip ba hadien ka 30 tarik Jylliew (Naitung), ki kali kiba yn shah iaid na kane ka jingkieng kan long tang ia kiba hapoh ka 12 metric ton.
Ia ka jingkieng Umiam la shna naduh u snem 1958 bad la lah ban pyndep ia ka ha u snem 1965. Ha baroh kine ki snem, kane ka jingkieng kala hap kyrda ia ka jingiaid jong ki kali ba khlem sangeh-bad barit bad baheh bad kumjuh ruh kiba kit mar haduh ba kala shong tor namar ka jingrim jong ka.
Ka jingshna pynkhlain bad maramot ia kane ka jingkieng kaba dang iaid mynta, ka dei kaba la pyntrei lyngba ka Dam Rehabilitation Improvement Project (DRIP), kaba ka thong jong ka project ka long ban pynkhlain bad pynjanai ia ki dam khnang ba kin long kiba shngain.
Ki kam kiba bun eh hapoh ka DRIP ki kynthup ia ka Drilling bad Grouting, ka jingmaramot ia ki dak orpait, bad ka Hydromechanical work.
Ka MePGCL ka pyntip ba ka jingle drilling bad grouting kala dep mynta kumba 60% eiei kat kum ka kaiphod bala ioh bad la shem ba ka jingpei um kala duna bha na ka dam.
Ka pyntip ba la buh por ban pyndep ia baroh ki jingtrei hapoh ka 30 tarik Jylliew 2024 ia kaba hadien kane, yn sa plie noh ia ka jingkieng ban iaid kali baroh arliang.
Hynrei ka pyntip pat ba hapoh ka 30 tarik Jylliew 2024, tang ki kali ba hapoh 4 MT yn shah ban iaid na kane ka jingkieng bad hadien ka 30 tarik Jylliew, tang ki kali kiba hapoh 12 MT yn shah ban iaid ban lah pynthikna ia ka jingshngain kaba neh slem jong kane ka jingkieng.
