Shillong, Iaiong 19: U President ka NPP Meghalaya u Bah Prestone Tynsong ula pynpaw iaka jingkyrmen ba ki kyrtong ka NPP kiba iakhun ia ka elekshon MP Lok Sabha kin ioh ia ka jingjop kaba don burom ha kane ka elekshon MP.
Ki kyrtong ka NPP ki kynthup ia ka Dr Ampareen Lyngdoh na ka Shillong Parliamentary Cosntituency bad ka Agatha K Sangma na ka Tura Parliamentary Constituency
“Katkum ka khubor kaba ngi iohlum, ngi don ia ka jingkyrmen bad nga ngeit skhem ba mynta ka kynti, baroh ar ngut ki kyrtong ki jong ngi ka Agatha bad ka Dr Ampareen kin ioh ban leit sha Delhi ban mihhmat ia ka jylla Meghalaya ha ka ïing Dorbar Thawaiñ jong ka Lok Sabha” ong u Bah Prestone Tynsong.
U Bah Prestone ula pynpaw ruh iaka jingsngewtynnad bad ula ai khublei ruh ia ki paidbah ka jylla kiba la mih ryntih ban leit thep ia ka vote ka jongki.
