Kumba tied da u ‘nem bah’ ia u Dr Mukul bad ka AITC ?
Shillong, Nailar 07: Kumba tied da u ‘nem bah’ ia ki katto katne ki Political Party kiba la pynlamwir ia ki paidbah na ka jingiasoi soskular pynbeit pud hapdeng ka Assam bad Meghalaya, ki sengbhalang Garo na Assam kila bthah ba ki dei ban sangeh noh shisyndon ia ka jingkynshoit ia ki kynhun bapher bapher bad wanrah ia ka jingbym iashaniah naba kane ka lam sha ka jingshah thombor jong ki Longiing Garo kiba sah ha Assam.
Kane ka jingkynthoh ki Sengbhalang Garo na Assam kala mih hadien ka jingshah kyndang jong kiba bun ki Longiing Garo na ka shnong Paglabasti bad Dekabasti, kiba hap hapoh ka Hojai district ka Assam.
Kine ki Sengbhalang ki kynthup ia ka Garo Students Union (GSU), Garo National Council (GNC), Garo National Union (GNU), Inter State Border Association (ISBA), ka Achik Socialist Youth Front of India (ASYFI), ka Garo Sahitya Sabha (GSS), ka All Garo Gaonbura Association (AGGA), ka Dudhnoi College Garo Students Union (DCGSU) bad kiwei kiwei, kiba la iakynduhlang myn ha ka sngi thohdieng ha Dudhnoi.
Kine ki Sengbhalang kila pynpaw ia ka jingsngewkhia kaba jur halor ka jingshah kyndang ki longiing Garo na Hojai District bad ong ba kane ka jingjia kala mih na ka jingkynshoit jong ki katto katne ki Political Party ka Jylla Meghalaya kaba long ruh kumjuh ia ka soskular iapynbeit pud.
Ki Nongialam jong kine ki Sengbhalang kila pynmih ruh ia ka kyrwoh bala iasoi lang ba ong ba kam dei satia ban mih kano kano ka jingiakynad hapdeng ne para paid Garo ban jied sha kano ka liang ba ki kwah ban don, la ka dei sha Meghalaya ne sha Assam.
Kum ka jingtied da u ‘nembah’ ia ki Political Party kiba pyrshang ban pynlong mat ialap elekshon ia ka kam pynbeit pud ha ka elekshon ban wan ha Meghalaya, kine ki Sengbhalang Garo na Assam kila ong “ Ym dei ban don satia kawei ruh ka Longiing ne ki riew shmet kiban mad ia ka jingshah thombor tang namar ka kam iapynbeit pud”.
“Kiwei ki Sengbhalang kim dei ban kynshoit ia ki Nongshongshnong ba sah ha khappud da ka jingthmu ban wanrah ia ka jingiashrut hapdeng ki shnong ki thaw lane wanrah ia ka jingbym sngewthuh jingmut hapdeng ki nongshongshnong jong kine ki shnong” kila bynrap.
Namar ka jingmih jong ki Sengbhalang na Ri-lum Garo kiba la iasnohkti lang ia ka jingdawa jong ka All India Trinamool Congress (AITC) ba ialam da u Myntri Rangbah barim Dr Mukul Sangma, ban pynduh pyndam noh ia ka soskular pynbeit pud, kine ki Sengbhalang na Assam kila kyntu ia ki Political Party na baroh artylli ki Jylla (Meghalaya-Assam) ba kim dei ban pynlong kam politics ne shim kabu ia ka jingiakajia pud ha ka kam politics namar ki paid Garo ki dei kiba shong ba sah sha baroh arliang ki Jylla.
Halor ka jingkyndang ia ki longiing Garo na Hojai District, kine ki Sengbhalang kila dawa ia ka Sorkar Assam ba ka dei ban shim ia ka jingkitkhlieh ha kaban ai ia ki lad jingiarap ia kine ki Longiing Garo bad kiwei kiwei ki paid riewlum.
