Tinsukia, Iaiong 09: U Myntri ka tnat kam pohïing ka Sorkar Pdeng u Amit Shah haka jingsynran lang u Myntri Rangbah ka Jylla Assam u Himanta Biswa Sarma, hynne ka sngi Ba-ar, ula shim bynta jaka jingiaid paidbah da ki kali lane Road Show ha Tinsukia ban pan jingkyrshan ia u Myntri Sorkar Pdeng u Sarbananda Sonowal u ba iakhun haka ilekshon MP Lok Sabha na Dibrugarh Lok Sabha Seat.
Ha kane ka sngi daki hajar ngut ki paidbah kila wan ban shim bynta haka Road Show bad la iohi ba u Amit Shah bad u Himanta Biswa Sarma kila ieng halor ka kali bala pynitynnad daki syntiew.
La iohi ruh ba u Amit Shah ula rah bad kaweh kti ban kyntu iaki paidbah ban thep Vote sha ka BJP.
U Myntri Sorkar Pdeng u Sarbananda Sonowal u khlem lah ban wan shim bynta haka Road Show namar ka jingbunkam ban ialap ilekshon sha kiwei pat ki jaka.
Nalor kane u Amit Shah ula shim bynta ruh haka jingialap ilekshon ha Lakhimpur ban pan jingkyrshan ia u kyrtong na Lakhimpur Lok Sabha u Pradhan Baruah.
