Shillong, Iaiong 09 : Ka National People’s Party (NPP) ha ka sngi Ba-ar, kala thalain tyngeh ia ka Liang Pyrshah Voice of the People Party (VPP) namar ka jingpynsaphriang ia ka politics kynshoit ban isih (politics of hate) ha Ri-lum Khasi bad Jaintia namar ka jingbym lah ban pynkohnguh ia ki paidbah da ki jingkular ba thylli jong ka party.
Kane kala mih shisngi hadien ba ki Nongkyrshan ka VPP kila leit pynthut ia ka jingialap elekshon jong ka NPP kaba long ha Umsning, Ri-Bhoi District, Mairang, Eastern West Khasi Hills, Jaiaw bad Rynjah ha Shillong.
Ha ka kyrwoh ba pyllait hynne ka sngi Ba-ar, u Nongaiktien ka NPP Bah Himalaya M Shangpliang ula ong “Ngi pynrem jur ia ki jingle jong ka VPP bad ki Nongkyrshan ban pynthut ia ki jingialap elekshon jong ngi bad ruh ban kren ia ki ktien sih ktien sang pyrshah ia ka kyrtong jong ngi”.
Ula pyntip ba ka Party kala dawa ban tuklar mardor da ka Election Commission of India (ECI) pyrshah ia ki nongialam jong ka VPP namar ka jingpynthut ia ki jingialap elekshon jong ka NPP.
“Kane ka pyni shai ba ka VPP kala nang blaw na ka jingduna ka jingwan kyrshan na ki paidbah. Ka VPP kam shym la lah ban pynkohnguh ia ki paidbah da ki jingkular ba thylli. Kumta, kala shim ia ka lynti ban pynkulmar bad pynthut ia ki jing ialang ialap elekshon jong ka NPP” ong u Bah Himalaya.
“Ka jingjia ba hynnin ka sngi ka dei kaba pynpaw shai kdar ba ka VPP ka sngewthuh ba ki jingkynnoh jong ka, kim shym la treikam satia pyrshah ia ka NPP, ta ka daw mynta kala pyrshang ban pyneh da ki doh ksah pyrshah ia ngi. U Nongialam ka NPP na Mawryngkneng Bah Pyniaid Singh Syiem ula kdew ia kaba dei ba ka VPP ka pyrshang ban wanrah ia u khniang West Bengal ha kane ka elekshon namar kine ki jingjia ki pynshisha ba kam lah shuh ban buhrieh ia ka jingshisha ba ka VPP ka dei ka Team B jong ka TMC” ula bynrap.
Une u Nongialam ka NPP ula dawa ruh ban leh eiei pyrshah ia ka VPP namar ka jingpynthuh ia ki jingialap elekshon jong kiwei kiwei ki party kaba long ka jingpynkhein ia ki kyndon ka ECI bad ka jingthmu ban pynlong ia ka elekshon kaba khuid bad ba suba.
U iathuh ba ka NPP kan sa buh iaka jingujor pyrshah ia ki Nongialam ka VPP namar ka dei ia ki ban shim ia ka jingbahkhlieh lada mih kano kano ka jingkulmar ba pynthut ia ka shongsuk shongsain.
“Sngewsih, ba kine ki dei kijuh ki briew kiba ialap halor ka clean politics (politics ba khuid) hynrei ki kam pat ki long da pyrdet. U Bah Ardent u dei ban leh ia kaei kaba u ialap bad sangeh ban ialam bakla ia ki paidbah ba ieid jingsuk da ki buit politics ba arsap jong u” ong u Bah Shangpliang.
 ha ka sngi Ba-ar, kala thalain tyngeh ia ka Liang Pyrshah Voice of the People Party (VPP) namar ka jingpynsaphriang ia ka politics kynshoit ban isih (politics of hate) ha Ri-lum Khasi bad Jaintia namar ka jingbym lah ban pynkohnguh ia ki paidbah da ki jingkular ba thylli jong ka party.){kind=link}