Shillong, Iaiong 08 : U Nongialam ka United Democratic Party (UDP) bad Myntri Sorkar Bah Paul Lyngdoh, ula kyntu ia ki paidbah ba kim dei ban peit ia ki “Si Iatur’ (masi iatur) hynrei peit ia ki ‘Si Lur (masi lur) ha kane ka elekshon Lok Sabha ban long ha ka 19 tarik, haba kren siat sha ka Voice of the People Party (VPP) kum ka masi iadur.
U Bah Paul Lyngdoh ula kren ia kane na ka rynsan ialap elekshon jong ka Regional Democratic Alliance (RDA) kaba long hynne ka sngi Nyngkong ha Jowai, West Jaintia Hills.
Une u President barim ka KSU ula ong “ Phi ki paidbah phi dei ban jied ym ia kiba ka nia ba shi kudam, ka kam tang shi kham… jied ia ki briew kiba nep ka jabieng, biang ka bor mynsiem, khlain ka jinglong ha ka nongrim”.
Ula ong “ngin nai peit ia ki ‘Si ia tur’ kiba pynshong shit sha iew sha hat, ai ngin peit ia ki ‘Si Lur’ ki ba trei jar jar namar na ki mih u khaw u kba, mih u soh, u pai” ong u bah Paul haba pynrem ia u nongialam ka VPP ( Bah Ardent Basaiawmoit) uba phail ha kiba bun ki liang khamtam ha kaba iadei bad issue MUDA.
Kat kum ka jingong jong u, “Don ki masi ba mih sngi iew, ba iaid sha ki thain nongkyndong, ba iaid artat bad ka khalai, iaid artat bad ka jingiadih kyiad bad iaid artat bad ka jingiatur. Hynrei ki don sa kiwei pat ki jait masi bad kita kidei ki masi ba phin iohi ym ha iew ha hat hynrei sha lyngkha, sha pynthor, ki ‘Si lur’ ki ong ia ki. Ki lur ki tih, ki pynkhreh ia ka lyngkha khnang ba u nongrep un lah ban thung i’u kba, i’u khaw, i’u jhur, u jhep ban bsa ia ki iing ban bsa ia ka iew bad ia ka shnong ka thaw”.
“Kaei ka jingiapher hapdeng kine ki arjait ki masi, ka long ba ki masi iatur ki ia kut tang ia ka jing pyni rong ha iew, ban pynshong shit ia u nongleit iew leit hat bad u nong leit leh sngewbha” ula ong bad bynrap “Don pat ki masi kiba lur jar jar hynrei na ka jingtrei ka jong ki, mih u khaw u kba, mih u soh u pai”.
U Bah Paul ula ong “Nga kwah ba ka jaidbynriew ka jong ngi, ma phi ki paidbah phin buh ialade kane ka jingkylli mano ba trei ia ka kam, mano ba pang ka ryndang ban kit ia ka kali, ban niah ban lur hato kidei kiba ia tur ha iew ne ki dei kito ki masi lur ha lyngkha, ha ki pynthor. Kum ka jaidbynriew, ngi kham phaikhmat sha kiba kyrkaw, kyrkiw, ki jingiathong, bad kiba pynshongshit, Hynrei, nga sngew ngi kum ka UDP, ngi lah rangbah, ngim peit shuh, ngim khmih lynti shuh tang ia ka jingiakynhoi, tang ia ka jingiathap kti, tang ka jingpynshit, ngi kwah ba ki kam ki jong ngi kin kren kham jam ban ia ki ktien ki jong ngi”.
Haba pynpaw ba dei ban phaikhmat sha kiba dang thymmai, u Bah Paul ula ong “Nga lah rung sha ka politiks ha ka snem 2002 bad ngi ruh ngi ialam ia ka seng kaba thymmai ha kato ka por – ka Khun Hynniewtrep National Awakening Movement lane ka KHNAM. Ngim shim la kyrkaw, ngim shim la kyrkiw, ngim shim la khwan burom…Ngi la don lang ha ka Sorkar ba ialam da u Bah DDLapang hynrei haba mih ka jingtyrwa ban ban ksam uranium ha West Khasi Hills, ma nga ryngkat bad u bah Lambor Malngiang, ngi don ha ka KHNAM, arngut ha ka Assembly jong 60 ngut, ngi lah thoh sha u Myntri Rangbah ban yn pynaid sha khmat ia ka kam khlem ka jingleit jngoh, jingleit jurip ia ki jaka kiba lah dep sei ia u uranium bad dei halor jong kata ka nongrim ba ka sorkar ha ka snem 2003, ka lah phah da ka kynhun sorkar sha Jadugoda kaba don ia ka jingtih uranium”.
“Mano ba lah ialam ia kata ka kynhun, ka Myntri jong ka koit ka khiah ha kata ka por dei ka Deborah Marak, Saidullah Nongrum ryngkat ki nongialam ka Khasi Students Union (KSU) bad halor ka jinglap jingshem ka report ba submit da kata ka kynhun ka sorkar Meghalaya ka la rai ban ym iaid sha khmat ia kane ka mining” ong u Bah Paul.
“Ngim shim lah kyrkaw, ngim shim la pyrta, ngi leh la ka jong ka kamram. Haba ka poi ka khyllipmat ba ka don ka jingpyrshang ban pyntlot ia ka MBOSE, nga ngeit phi kynmaw bha, kum u Myntri uba don ha ka Sorkar, nga la pyrshang ban iakhun ban nym ai lad ban pyntlot ia ka MBOSE bad ka ophis jong ka ha Shillong bad dei halor jong kane ka jingiakhun ba nga iohi ba ym don lynti da kumwei pat hynrei ban iehnoh ia ka kam kum u myntri sorkar. Nga lah leh ruh ia kata ha ka snem 2005” ula bynrap.
U Bah Paul ula ong “ Kane ka jingpyrshang jong kiwei pat ki seng sain pyrthei (VPP) ban pynshong shit ban ong ba tang ma ngi kiba hylla, tang ma ngi kiba kaw-kaw, tang ma ngi kiba ieid ia ka jaidbynriew, kiwei kiwei kim shym leh nga ong ia phi ka long kaba ialam bakla haduh katta katta” bad bynrap “ Peit hi ma phi kaei kaba jia hadien ka jingiahylla kyrkiw ia kata ka jingtam pud ba lah kynnoh ia ka MUDA”.
“Kidei kita ki juh kiba ong ia ngin ia lum paidbah, ngin ia iaid da ka procession sha Secretariat, shah kawang maw ki pulit, shah kawang ki nongthoh khubor, khadduh mih aiu ym shim poi shaei shaei ruh” ula kynthoh haba ong “ Nga dei ban iathuh namar lada ngam kren phin nym tip, lada nga kren phin ong une uba kob bha tang ba bha ba nga kob khnang ba phin tip”.
 bad halor ka jinglap jingshem ka report ba submit da kata ka kynhun ka sorkar Meghalaya ka la rai ban ym iaid sha khmat ia kane ka mining” ong u Bah Paul.){kind=link}