Tura, Iaiong 08: Ki tymmen kiba la kynjoh 85 snem shajrong lem bad ki briew ba duna dkhot met ba kot 40%, hynne kila pyndep ia ka hok thep vote nala ka jong ka thliew Iing ha kane ka elekshon Lok Sabha 2024.
Kane ka jingpyn thep vote na Iing ia ki tynmen bad kiba duna dkhot met, ka dei kaba la pynlong kat kum ka jingbthah jong ka Election Commission ka Ri India, kaba treikam ha baroh ki District kiba la buh dala ka jong ka sngi thep vote.
Kane ka dei ka sien ba nyngkong eh ha ka histori jong ka elekshon Lok Sabha ba ka ECI kala ai ka lad ban “thep vote nala ka jong ka Iing” ia ki tynmen bala 85 snem shajrong bad ki briew ba duna dkhot met.
Haduh 6106 ngut ki nongthep vote kila pynrung kyrteng ban thep vote nala iing ha baroh kawei ka Jylla. Haduh 3424 ngut kila pynrung kyrteng na ki 36 tylli ki Assembly constituency ka Shillong Lok Sabha seat bad kaba sah kata 2682 ngut ki dei na ki 14 tylli ki Assembly constituency jong ka Tura Lok Sabha seat.
Hynne ka sngi, ka jingpynthep vote nala iing kala long ha West Garo Hills bad kan bteng haduh lashai ka sngi ka 9 tarik Iaiong.
Haduh 362 ngut ki nongthep vote ha kane ka district kila aplai ban ioh thep vote nala iing lyngba ki Block Level Officer (BLO).
Ka Ri-Bhoi Disrict ruh kala pynlong ia ka jingthep vote nala iing ia ki tynmen bad ki briew ba duna dkhot met hynne ka sngi.
Ka jingpynthep vote nala iing ha ka 7-Amlarem Assembly constituency kan sdang ha ka 12 tarik Iaiong bad ka jingthmu ka long ban pyndep hapoh ka 13 tarik Iaiong.
Ka jingpynthep vote na Iing ha South Garo Hills kan long ha ka 12 bad 13 tarik Iaiong.
Ka jingpynthep vote na Iing ha East Garo Hills kan long ha ka 12 bad 13 tarik Iaiong.
