Shillong, Lber 30: Ka Hat-Trick jongu Andy Mawthoh, kala pynlong ia ka Ryntih SC ban pynrem kput ia ka Nongthymmai SC da 5-0 ha ka jingiakhun ia ka Shillong Premier League 2023 kaba la long ha SSA Stadium ha First Ground, Polo, hynne ka sngi saitjaiñ.
U Andy ula thep ia ka kol ha ka minit kaba 25 jong ka kylla step bad ha ka minit kaba 64 bad 68 ha ka kylla miet. Katba ia ki ar tylli kiwei pat ki kol la ioh thep da u Banehskhem Khongsdam ha ka minit kaba 75 bad 90’+4.
Ka Ryntih kala iakhun 3 sien ha kaba kala iakhaid bad ka Mawlai SC, shah rem ha ka Shillong Lajong FC bad hynne ka sngi kala ioh khur ia ka jingjop da kaba pynrem ia ka Nongthymmai.
Ka Nongthymmai kala ialehkai bha bad kala ioh katto katne tylli ki kabu hynrei kam shym la lah ban thaw pyrthei eiei. Hadien kane ka Nongthymmai kala ioh biang ia ka kabu, hadien ba la mih bujli u Iohborlang Nonglyer ha kaba ula shut jam na jngai ia ka bol hynrei u rangap kol ka Ryntih u Dipanjan Debnath ula ioh ban iada ia katei ka bol ban rung shapoh kol.
Ha ka jingiakhun iaka SPL, ka Ryntih mynta kala kiew na ka kyrdan kaba 6 sha ka kyrdan kaba 3 da kaba ia ryngkat point bad ka Mawlai SC kaba dang don sa kawei ka jingiakhun ha kti.
Ka jingiakhun haka Sngi Nyngkong kan long hapdeng ka Mawlai pyrshah ia ka Sawmer SC ha ka por 3 baje mynsngi.
