SHILLONG, Lber 26: U Nongialam ka seng Congress bad u MP ka Lok Sabha u Bah Vincent H Pala hynne ka sngi baar, ula ong ba ka BJP kalashet kylla ia ki nongkyrshan da kaba rai ban ai jingkyrshan pura ia ka National People’s Party ha ka elekshon MP Lok Sabha.
Katkum ka jingong ka jong, kiba bun ki nongthep vote jong ka BJP kin ym thep vote ia ka NPP.
Haba iakren bad ki nongpathai khubor, u Bah Pala ula ong, “Ka BJP kadei ka BJP, ka NPP kadei ka NPP. Mynta ki paidbah kila tip, kila sei madan ba man la ka vote sha ka NPP kadei ka vote ia ka BJP. Man la ki rai kiba la shim da ka BJP kadei ka rai kaba la shim da ka NPP kumta kam don ka jingiapher hapdeng ka NPP bad ka BJP”.
“Hynrei kawei kaba kongsan bha kadei ba ka nongrim jong ka BJP bad ki nongialam ki lah ban mynjur ban iasnohkti bad ka NPP hynrei ki nongtrei kila nang jah. Ki paidbah ka Meghalaya, kiba shaniah ia ka BJP, kila shah shet. Nga tharai kiba bun hi ki nongthep vote jong ka BJP kin ym leit sha ka NPP. Ki nongthep ki iapher bad ka BJP ruh ka iapher” ula ong.
Ula ong, kiba bun ki nongkyrshan ka BJP kin kyrshan ia ka Congress.
“Nga kyrpad ia ki baroh ban wan sha nga. Nga pdiang sngewbha ia iwei pa iwei i nongthep vote ban wan sha nga na baroh ki seng saiñ pyrthei, ym tang na ka BJP hynrei na kiwei kiwei ki seng ruh. Kane kadei ka jingpyrta ia ngi. Na ka bynta kaDelhi ngi hap ban iatylli, la kadei ka VPP, UDP, NPP ne BJP, na ka bynta ka Delhi. Ngi im ha ka jylla kaba rit. Nga lah long MP la 15 snem, nga latrei na ka bynta jong baroh. Hadien ka elekshon, nga long na ka bynta jong baroh. Da katei ka jingshemphang ki paidbah ka Meghalaya ki don, bun na ki kin sa wan” ong u Bah Pala.
