Kohima, Lber 25: Artylli ki seng sain pyrthei ba khlain bor ka thain Shatei Lam Mihngi-ka National People’s Party (NPP) bad ka National Democratic Progressive Party (NDPP) kila iasnoh tyrpeng ha Nagaland ban phah ia ka khubor sha ki Liang Pyrshah ia ka jingiatylli ka kynhun synrop National Democratic Alliance (NDA) ha kane ka elekshon Lok Sabha ban wan.
U National President ka NPP bad Myntri Rangbah ka Jylla Conrad K Sangma ula iakynduh hynne ka sngi Nyngkong ia u Myntri Rangbah ka Nagalang Neiphiu Rio, ban tyrwa ia ka jingkyrshan ia ka NDPP ha kane ka elekshon Lok Sabha, ka ban long ha ka 19 tarik Iaiong.
Ka BJP kala rai ban nym sei kyrteng satia ha Nagaland bad Meghalaya ban ai ka jingkyrshan iala ki jong ki paralok ba iatreilang ha ka NDA. Ha Kohima, Nagaland kala rai ban kyrshan ia kyrtong ka NDPP bad ha Tura-Shillong Lok Sabha seat kan kyrshan ia ki kyrtong ka NPP.
Namar kane, ka NPP ruh kala budlang ia ka sienjam jong ka BJP da kaba rai ban nym sei kyrtong ban iakhun ha Nagaland.
“Ka State Committee jong ngi (NPP) ha Nagaland kala iakynduh hynne ka sngi bad kala rai ban kyrshan ia u kyrtong ka NDPP bad ruh ban ai ka jingkyrshan kum ka mynsiem shiparalok hapoh ka NDA” ong u Conrad K Sangma haba iakren bad ki lad pathai khubor ha Kohima.
Ula ong ba baroh ki paralok ha ka NDA kila iatylli kawei ha kaban kyrshan kawei ia kawei pat kum ka mynsiem shi paralok ba iatreilang ha ka NDA.
“Kumba phi tip, ki paralok ha ka NDA kila pynpaw ia kajuh ka jingkyrshan ia ki seng sain pyrthei bapher bapher jong ka NDA kiba la buh ia ki kyrtong ha ki constituency bapher bapher ka thain Shatei Lam Mihngi. Kum ka nuksa, ki paralok ka NDA kila kyrshan ia ki kyrtong ka NPP ha Meghalaya, ha Arunachal Pradesh ki paralok ka NDA kila kyrshan ia ki kyrtong ka BJP bad ha Outer Manipur seat ngin ai ka jingkyrshan ia kyrtong ka NPF” pynbna u Conrad.
Ka NPP ka dei ka party kaba don haduh 5 ngut ki MLA ha Nagaland, kaba tam ia ka Liang Pyrshah Nagaland People’s Front kaba don 2 ngut ki MLA bad ka Congress-1.
Ka jingkyrshan ka NPP ha ki 5 constituency, ka BJP kaba don 12 ngut ki MLA bad ka NDPP kaba don 25 ngut ki MLA ha ka Iing ba 60 ngut ki MLA, ka dei kaba la khmih lypa kum ka jingjop ia ka kynhun synrop wat hashuwa ban sdang ka jingiakhun.
