Nongpoh, Lber 25 : Ka Ri-bhoi Youth Welfare Organisation (RBYWO) kala ujor sha u Deputy Commissioner ka Ri-Bhoi halor ka jingshah pynduh ki trai shnong ne local supplier ban pynbiang bam sha ki nongpyniaid ia ka elekshon Lok Sabha ban wan.
Kane ka jingujor kala mih halor ka jingkynnoh ba ka Tnad pyniaid elekshon kala ai tang ha uwei u briew uba dei na Shillong ban supply ia ka bam ka dih ia ki briew ba pyniaid ia kane ka elekshon ha Ri-Bhoi District.
Ka RBYWO hapoh ka jingialam u General Secretary Kenny Nongrum, kala aiti da ka dorkhas ha u DC bad dawa ba ka bor District kan aikam shuwa ia ki trai shnong ne ki local supplier ba kin pynbiang ia ka bam kumba ju leh ha ki elekshon bala dep kynthup ka elekshon MLA 2023.
“Ngi la ioh pdiang ia ki jingujor na ki local supplier bad kum ka seng ngi kwah ban tuklar ia kane ka kam khnang ba ki trai shnong kin ioh kam lang” ula ong.
Kat kum ka jingong jong u, kine ki local supplier ki dei kiba pynbiang bam ha ka elekshon MLA-2023 haba pyntip ruh ba kine ki nongpynbiang bam haduh mynta kim pat ioh satia ia ka jingsiew ia ka bai bam jong kane ka elekshon.
