Shillong, Lber 22 : Haba khein ba kam iahap ka jingkren u Nongialam ka Congress Bah Vincent H Pala pyrshah ia ka BJP bad ka jingialam bakla ia u paidbah, ka Meghalaya BJP kala dawa ia une u MP ka Shillong ba u dei ban ai sakhi ia kawei ka jingjia ba pyni ia ka jingbym burom ka BJP ia ki Balang lem kumta u dei ban nguid noh mardor ia kaei kaba la kren.
“Ka BJP Meghalaya kala kdew ia kiba bun ki khep ba u Myntri Rangbah Duh ka Ri ula leit leh burom ha ki Iingmane bad kumjuh ruh ia shibun ki kam bhalang ki paid Khristan bala leh da ki Nongialam ka party ha Jylla” ong ka party ha ka kyrwoh.
Ka BJP kala pynkynmaw ia u Bah Pala, ba ha ka prokram rakhe Khristmas bala pynlong ha Iingsah u Myntri Rangbah Duh, u Narendra Modi ula ai ka jingiaroh ka ba khraw ia u Jisu Khrist bad ia ki jinghikai jong u.
Ka Meghalaya BJP kala pynkynmaw ruh ia baroh ba ha ka por rakhe Khristmas, ki nongialam ka Party ba kynthup ia u Bah A.L.Hek bad kiwei kiwei, kila pynlong ia ki prokram na ka bynta ki khynnah, bad pynphuh mut phuhmat ruh ha kylleng sawdong, kaba long pyrshah ia kaei kaba la kren da ki nongialam kum u Bah Vincent Pala.
U Nongaiktien ka BJP Bah Mariahom Kharkrang ula ong “Ka Congress ka tip bha ba ki kabu ia ka kila nnang lip rong katba nang iaid ki sngi bad ka bok jong ka BJP kala nang paw bha. Kum kine ki jingkynthoh ki dei tang ka buit bad ka jingpyrshang kut lad ban ioh ia ka vote sngewlem. Ki paidbah kila iohi lyngba ia kum kine ki jingialehkai la slem bha bad kin ai vote sha ki bym pyniakhleh niam, vote sha u/ka kyrtong BJP ha kane ka elekshon MP ban wan.
