Nongstoin, Lber 17 : U Deputy Commissioner ka West Khasi Hills, ha ka sngi Saitjain, ula lum ia ka jingialang bad ki seng sain pyrthei bapher bapher kiba don hapoh ka District, ban pyntip ia ka jingtreikam jong ka Model Code of Conduct (MCC) jong ka elekshon Lok Sabha 2024.
Kane ka jingialang ka long kum ka jingpynkynmaw ïa baroh ki seng saiñ pyrthei, ba kim dei satia ban pynkheiñ ïa ki kyndon jong ka Model Code of Conduct, khnang ban ïoh ka election kaba khuid kaba suba, khlem kino kino ki jingpynthut hapoh ka distrik.
U Deputy Commissioner, Bah Garod L.S.N Dykes, IAS u la pynkynmaw ba ha ka election MP 2019, ka West Khasi Hills, District ka dei ka districk kaba duna bha ha ka jingwan jong ki nongthep vote kaba kot tang 64.4%. Kumta, u la kyntu jur ïa baroh ki nongthep vote ba ki dei ban don iaka jingkitkhlieh bad ban pyndonkam hok ïa ka hok thep vote jong ki.
Mynta ka kynti, kino kino kiba kwah ban ïoh jingbit na ka bynta ban pynlong ïa ki jingïalang paidbah, ki rally lane kino kino kam kiba ïadei bad ka election, ki hap ban da pan jingbit bad apply online lyngba ka Suvidha App.
Lada don kiba kwah ban ujor ia kiba pynkheiñ kyndon MCC, ki lah ban ujor lyngba ka VIGIL App.
U Deputy Commissioner u pyntip ruh ba la pyntreikam ïa u control room number 03654280152 lada don kiba kwah jingtip kiba ïadei bad ka election, kumjuh ruh ïa u toll-free helpline number 1950 la dep ban pyntreikam, khnang ba ki paidbah ki lah ban ujor ïa kino kino ki jingujor kiba ïadei bad ka election.
