Nongstoiñ, Lber 17: Ka Kur bah jong ka jaid Kharbani Khasi bad Jaiñtia ha ka sngi saitjaiñ, ka la thaw da ka komiti kaba kyrpang ban buddien ia ka jingshah pyniap dusmon u nongniah kali Tourist samla Macborn Bonnyson Kharbani, kaba jia ha ka miet 3 tarik Lber ha Nongstoin.
Ia kane ka komiti la thaw ha ka jingialang jong ka Kur kaba la iathir iatai sani bha halor ka jingjia kaba jia ia une u dkhot ka Kur.
U bah Macmillan Kharbani General Secretary ka kur Kharbani sengkmie, ka la ong ba ha katei ka jingïalang la ïakut ban ai jingkyrshan pura ïa I kong Violin Kharbani, kmie jong u samla Macborn Bonnyson bad ka ïing ka sem haduh ba kin ïoh ïa ka jingbishar kaba hok.
Ula ong ba kane ka komiti kaba la thung kan trei shitom haduh ban da lap dien ïa kiwei pat ki runar thrang snam, kiba la donkti lang ban thombor bad shim jubor ïa ka jingim u khun ka kur Kharbani.
Ha katei ka jingïalang la ïadonlang ruh naduh u bah Beststarwell Kharbani President ka kur Kharbani, bah Phranklin Kharbani vice president Nongstoiñ, bah Alfred Kharbani Vice President, Shillong bad kiwei kiwei kiba na Sawsymper, Umyiap, Mawshynrut, Shillong bad kylleng ki jaka.
