Delhi, Lber 16: Ka Election Commission ka Ri India kala pynbna baka elekshon Lok Sabha ba 18 jong ka Ri, kan long ha ki hynniew tylli ki phase. Ki Jylla ka thain Shatei Lam Mihngi kin thep vote ha ka phase ba nyngkong, ha ryngkat ki Jylla ba Shathie ka Ri ha ka 19 tarik u Iaiong.
Napdeng ki 543 tylli ki parliamentary constutency ha Lok Sabha, 47 tylli ki seat ki dei kiba la buh bhah ia ki Schedule Tribe (ST) bad 84 tylli la buh bhah ia ki Scheduled Caste (SC).
Ka jingthep vote jong ki 97 klur ngut ki nongtheo vote kan long ha baroh ki Jylla ka Ri, ha ki 10.5 lak tylli ki Polling Station. Haduh 1.5 lak klur ki nongpyniaid elekshon (polling official) bad ki bor pahara la buh ban khmih ia ka elekshon. Haduh 55 lak ki EVM bad 4 lak tylli ki kali yn pyndonkam.
U Chief Election Commission Rajiv Kumar ula ong ba kane ka tamasa ka riti synshar paidbah kan long ha manla ki kyndong kynshrot jong ka Ri. Ka ECI kala shim ia baroh ki sienjam kiba donkam ban pynthikna ba ka jingpyniaid ia ka elekshon kan long kaba khuid bad ka bym shah liang. “Ngin poi lut sha manla ki jaka, la ka dei ki lum, ki jaka ba sop thap, lane ha pdeng jong ka khlaw, khnang ba ki nongthep vote jong ngin kin ym mad ia ki jingeh” ong u Kumar.
U Kumar ula ong ruh ba ka jingpynlong ia ka elekshon kan long ha ka lynti kaba janai bha bad ki Tnad Election kin pynthikna ia ka jingbym don ka jingpynsyrwa kai ha ki Polling Booth, pyndonkam ia ka jingpyndonkam ia ki kot ki sla bad pynduna ia ka carbon footprint.
Ula pyntip ruh ba yn pyndonkam pura ia ki kor technology ban pdiang ia ki jingujor, ban ai jingbit lane ban register ia ki jingud jingnam.
Haba pyntip ba palat T. 3500 klur la ioh kurup ha ka elekshon bala lah, ula ong, ka ECI kala wanrah ia ki lad treikam ban tehlakam ia ka pisa, ka ksah bad ka jingpynsaphriang khubor lamler.
“La dep btah ia ki jingbtheh sha ki bor khmih ba kin tehlakam ia ki kam ba iaid ha ka lynti ka ba bakla. Ngin peit pyrman ia ka jingsam ia ki jingai sngewbha, ka kyiad bad ka jingpynthep pisa online” ula bynrap.
Ki Bank kin ai kaiphod sha ka ECI manla ka sngi ban pyntip ia kino kino ki jingiathep iasei pisa ba I shankhmat, ula ong.
U Kumar ula maham ruh ia ki seng sain pyrthei ba kim dei ban iaid ialap elekshon da kaba kynthoh shimet hynrei ban ialap halor ki ishu bad ki nongrim. Kala maham ruh ba ym dei ban pyndonkam ia ki Khynnah ha kano kano ka rukom ha ka por ialap elekshon.
Ka ECI ha ka sngi Saitjain kala pynbha iaki tarik jong ka elekshon Lok Sabha. Ka Elekshon ha Meghalaya kan long ha ka 19 tarik Iaiong bad kan hap ha ka Phase-I. Ka jingniew vote kan long ha ka 4 tarik Jylliew.
U CEC ula pynbna ba kane ka elekshon Lok Sabha kan long ha ki 7 tylli ki phase. Da ka jingpynbna ia ka tarik, ka Model Code of Conduct kala treikam mynta hapoh ka Ri.
Phase 1: 19th April (102 seats)
Phase 2: 26th April (89 seats)
Phase 3: 7th May (94 seats)
Phase 4: 13th May (96 seats)
Phase 5: 20th May (49 seats)
Phase 6: 25th May (57 seats)
Phase 7: 1st June (57 seats)
Ka jingpynbna ia ka result kan long ha ka 4 tarik Jylliew
