Shillong Lber 15: Da ka jingthmu ban iasnohkti lang ha ka jingpyrshang jong ka Sorkar ban kyntiew ia ka roi ka par ha ka jylla Meghalaya, ka Methina Farida Marak bad u Nokma ka Resu A’king, Resubelpara, kila noh synniang ia ka jaka kaba 106 akar sha ka Meghalaya Industrial Development Corporation Ltd (MIDC) ban shna ia ka Logistic park kaba paka.
U Chairman ka MIDC u James P.K. Sangma, ula pynpaw ia ka jingsngewnguh ia u Nokma bad ia ka Kur baroh kawei halor ka jingdon ia ka mynsiem iatreilang bad ka Sorkar.
“Kane kadei ka sienjam kaba khraw bha na ka liang jong u Nokma. Ngi sngewnguh ia ka Kur kiba la wan shakhmat ban iasnohkti ha ka jingpyntrei ia ki kam pynroi ha ka shnong ka thaw, kaban long kaba kongsan bha ia ka jylla Meghalaya” ong u James.
Ula ong ban don ia ka Logistic Park ka dei ka jingdawa jong ka por bad kane kan iarap shi katdei eh ha kaban pynhiar ia ka dor jong ka jingkit jingbah ia ki mar ki mata bad ia ka por ruh kumjuh, kan pynduna ia ka jinglut jingsep ha kaban pynpoi beit ia ki mar ki mata sha ki nongthied bad kan pynduna ruh iaka jingjaboh kaba pynmih na ki kali nalor ka jingkhapngiah lem bad lap bad tip ia ki mar ki mata haei kila lah poi lyngba ka jingpyndonkam ia ki kor teknoloji.
U Abraham V J, u Chairperson jongka Nokma Advisory Committee, ula pynpaw ia ka jingkongsan jong katei ka projek khamtam eh ha kaba iadei bad ka jingkyntiew ia ki samla.
“Hapoh ka jingialam jong u Nokma jong ngi, ngi la lah ban shim ia kiba bun ki sienjam na kabynta ban kyntiew ia ki samla. Hynrei kane ka projek kan dei kaba heh tam na ki sienjam kiba ngi la shim haduh mynta bad ngi sngewkmen ba ngi la iatreilang bad ka MIDC kum ka paralok ha katei ka projek,” ula ong.
Kane ka jingnoh synniang ia ka jaka da u Nokma kadei ka mawjam ha kaban shimkhia iaka jingiatreilang ha ka imlang sahlang kaban long ka jingpynneh ia ka roi ka par bad ban pynseisoh iaka jylla Meghalaya.
Kane ka sienjam kadei ruh ka nuksa ia kiwei pat ban iadonbynta lang ha kaban kyntiew ia ka roi ka par ha ka jylla da ka jingiatreilang hapdneg ki nongialam shnong bad ki tnad pynroi.
