Agartala, Lber 14 : U Myntri Rangbah ka Tripura Manik Saha ha ka sngi Palei ula ong ba ka jingiabit jingpang HIV/AIDS ha Tripura kala kiew bha bad pyntip ba kumba 150-200 ngut ki briew ki iabit ia kane ka jingpang manla u bnai.
U Saha ula pynpaw ia ka jingsngewkhia halor kane ka jingkiew kane ka jingpang bad ong ba baroh ka dei namar ka jingia injek drok hapdeng ki samla pule bad ki samla.
“Baroh ki club, ki sengbhalang bad ki kynhun bapher bapher ki dei ban wan shakhmat ban pynsngewthuh ia ki briew khamtam ia ki samla ba kin nym ngop ha u droks bad kiwei ki kam bymman” ula ong.
Naduh u 1970, ka Manipur ka dei ka Jylla ba hakhmat eh hapoh ka thain Shatei Lam Mihngi ba jur ka jingiainjek droks, ula ong haba iathuh ba baroh ki Jylla ka thain Shatei Lam Mihngi bad ka Ri, da ka jingbtin lynti bad jingiarap ka Sorkar Pdeng, kila pyrshang ban pynlong ia ka Jylla bad ka Ri kaba lait noh na u droks ne Nasha Mukt.
“Dang shen nga iakynduh ia u samla pule ha Belonia, South Tripura uba iathuh ba u dei u samla pule uba stad bha bad u nongialehkai ruh, hynrei ula ngop ha ka jingdih droks. Hadien san snem, ula ieh noh ia u droks bad mynta ula iakhun ban jop ia kane ka jingmlien ba sniew” ong u Saha.
U Saha ula kyntu ia baroh kynthup ki Nonghikai, ki Nongtrei ka koit ka khiah bad ki Sengbhalang ba kin wan ia ka thymmei jong ka jingiajyllei u droks bad ban iakhun ha kaban rat dyngkhong ia ka jingpang HIV/AIDS.
