Guwahati, Lber 12: Ka Assam Pradesh Congress Committee hynne ka sngi kala pynlong daka jingiakhih ha Rajiv Bhawan Guwahati ban pyrshah iaka jingpynbna ka Sorkar Pdeng bala pyntreikam iaka Citizenship Amendment Act (CAA) haka janmiet jong ka 11 tarik mynta u bnai.
Ka nongialam ka Liangpyrshah ba synroplang ka Debabrata Saikia, bad ka Assam Pradesh Mahila Congress President ka Meera Barthakur nalor kiwei kiwei kila shim bynta haka jingiakhih.
Ha kane ka jingiakhih, ki nongiakhih kila thang iaka Copy jong ka CAA bad kila pyrta ki kyntien ban pyrshah iaka CAA bad iaka Sorkar Pdeng ba ialam daka BJP bad u Myntri Rangbahduh ka Ri u Narendra Modi.
Haba iadei bad kane ka Sorkar Assam kala pynkhlain iaki bor pahara hakhmat ka Ophis treikam ka Seng Congress.
