Shillong, 05 Lber : Ka jingpynkhreh ka Balang Presbyterian Laitryngew, Sohra Presbytery ban pdiang īa ka jingïaseng Khasi Jaiñtia Presbyterian (KJP) Synod Sepngi kaba 22 naduh ka 7 tarik haduh ka 10 tarik u Lber, 2024 ka la ïaid shaid shaid ha katei ka shnong.
Ha ka 5 tarik u Lber, 2024, u MLA ka Sohra, u Bah Gavin M Mylliem ha ryngkat ki nongïalam ka Balang na Laitryngew, ki nongïalam shnong kumjuh ki dkhot na ka Sohra Presbytery, ki la pynlong ka jingjurip ia ki jingdonkam na ka bynta kane ka jingïaseng naduh ki jaka ïeng kali, ka jaka pynlong jingïaseng haduh ki jaka leit bar nalor kiwei pat.
Ha kaba ia dei pat ka lynti syngkien, la shna ia ki surok rong ha ki bynta bapher bapher ka shnong khnang ban pynsuk ia kiba wan sakhi ia kane ka jingïaseng nalor ka um bam um dih.
“Ka jingpynkhreh ban shna ia ki surok na ka bynta kane ka jingïaseng ka dei naduh u snem 2019 bad ka mang tyngka ka la wan kumba 10 klur ha u snem 2022 na ka bynta 5 KM ka surok haba khein kyllum lang baroh”, la ong u Bah Gavin.
U la ong ba na ka bynta ka um bam pat la wanrah lyngba ka skhim sam um kaba la tip kum ka Laitryngew Mawkma Combined Water Supply Scheme kaba long 10 klur tyngka.
Na ka liang u Pastor Nongrud, Executive Secretary Sohra Presbytery u la ong ba ka Balang ha ka jingpynkhreh ia ka jingïaseng Synod ka la pynbiang bha ia ki jaka ieng kali ban pynsuk ia ki para bangeit kiba wan sha kane ka jingïaseng.
