Shillong, Rymphang 28: Lada don ki dukan die kot skul kiba die kot haka dor kaba palat ia ka dor bala shon hapoh kot, ki paidbah ki dei ban leit ujor daka ejahar pyrshah ia kine ki dukan hapoh ki Police Station.
Ia kane la ong da u Myntri ka tnat Pule u Rakkam A Sangma haba bynrap ba ki trai dukan kim lah ban die palat iaka dor ba la shon haki kot skul.
U Rakkam u la ong baka Meghalaya Board of School of Education (MBOSE) kala dep pynmih daka hukum (Order) shaki Nongpynmih kot (Publisher) bad katno tylli ki kot ki dei ban pynmih bad katno ka dor ki dei ban die.
“Namar ka MBOSE kala dep ban pynmih daka Order, iaka dor ban die iaki kot skul, ka jingkylli ban die rem iaki kot kam mih satia bad lada don kiba die tam iaka dor bala shon haki kot, ki paidbah ki dei ban ujor beit daka ejahar pyrshah iaki trai dukan” ong u Rakkam.
