Shillong, Rymphang 21 : U MLA ka Congress na Umsning Dr Celestine Lyngdoh ha ka sngi Balang ula buh jingkylli la ki Judge bala shongthait ki dang bteng ban long ki VVIP hapoh ka Jylla.
Haba wanrah ia ka jingkylli bynrap ha Iingdorbar, u Dr Celestine ula ong ba daw ba pynlong ia ki ban kylli ia kane ka jingjia ka dei namar haba ki leit sha Meghalaya House, la ju pyntip sha ki ba ia kane ka kamra ne katai ka kamra la buh na ka bynta ki Judge bala shongthait.
Ula ai jingmut ruh ba donkam ban bishar thymmai ia ki jingmyntoi bala ai sha ki Judge bala shongthait. Kat kum ka jingong jong u, kan long ka jingkit kaba khia ia ka Jylla ba rit kum ka Meghalaya lada ka ai ia ki juh ki jingmyntoi wat sha ki Judge ba wan tang lai bnai bad mih noh na ka jingshakri ha ka High Court ka Meghalaya.
Haba jubab ia kane, ka Myntri ka Tnad Ain Kong Ampareen Lyngdoh kala ong “Baroh kine ki jingmyntoi bala ai sha ki Justice bad ki Judge ka dei kaba la buh da ka ain ka Parliament. Ngi hap ban bud ia kine ki kyndon bad ruh ia ki katto kane ki hukum jong ka Supreme Court kaba la ai jingmut ia kine ki jingmyntoi”.
Shuwa kane, ka Myntri ka pyntip ba ka Secretariat Assistance bad Domestic Help Allowance sha ki Chief Justice bala shongthait ka long T. 50,000 bad ki Judge bala shongthait ka long T. 40,000.
Kat kum ka jingong jong ka, kijuh ki jingmyntoi bala ai da kiwei ki Jylla ka Ri sha ki Justice bad Judge ba la shongthait ba sah satang lai bnai ha ka jingshakri, yn ai ia kijuh ki jingmyntoi.
