Shillong, Rymphang 21 : U Symbud Myntri Rangbah ba khmih ia ka Tnad Commerce & Industries Bah Sniawbhalang Dhar ha ka sngi Balang, ula pyntip ba ka Sorkar Jylla kan sa shim rai khatduh la yn khangdam noh ne em ia ka Mawmluh Cherra Cement Limited (MCCL) hapoh ka hynriew bnai.
Haba jubab hapoh Iingdorbar, u bah Sniawbha ula ong ba ka kam ban khangdam noh ia ka MCCL ha Sohra ka dang don hapoh ka jingbishar jong ka Sorkar.
Ka MCCL kaba don 278 ngu ki Nongtrei, kala khang khyrdep naduh u snem 2020.
“Hapoh ka hynriew bnai, ngin sa lah ban shim ia ka rai (ban khangdam ia ka karkhana)” ula ong.
U Bah Sniawbha ula kular ruh ba ka Sorkar kan khot iakren ia baroh ki kynhun ba iadon bynta ban lah shim ia ka rai kaba biang eh.
“Nga kular ia phi ba ngin shim ia ka rai kaba dei bad yn ym don mano mano ruh ki ban shah ktah” ula ong.
U Symbud Myntri Rangbah ula ong ba ka Sorkar kan sa thaw ia ki lad ki lynti (ban kitkhia ia ki Nongtrei) lad aka rai ban khangdam noh ia ka karkhana.
U bah Sniawbha ula pynpaw ia kane haba jubab ia ka jingkylli bala wanrah da u MLA ka AITC na Nongthymmai Bah Charles Pyngrope.
Kat kum ka jingong u Bah Sniawbha, ia mynta la siew ia ki nongtrei jong ka MCCL kat kum ka jing ioh pisa.
Shuwa kane, u MLA ka NPP na Sohra bah Gavin Mylliem ula kyrpad ia ka Sorkar Jylla ban pynkloi noh ia ka rai ha kaban iasyllok bad ki kynhun bapher bapher bad ban pynthikna ba ka dei ban long n aka bynta ka bha ka miat jong ki nongtrei.
