Agartala, Rymphang 21 : Ki dkhot ka Bajrang Dal ha ka sngi Ba-ar kila pynlong ia ka jingiakhih shabar jong kawei ka skul Missionary ha Agartala hadien ba uwei u nonghikai ula khang ia ki samla ba kin deng ia ki jingteh kti ka niam Hindu.
Kane ka skul ka dei ka Holy Cross School Agartala. Kane ka skul kala niew ia kane ka jingjia kum kaba shu jia ryngkhat bad kala pynmih ia ka khubor ba ka skul kan bat ia ka jing long laitluid ban ngeit niam.
U Principal ka skul Rev Jilson Tom ula pynpaw ia ka jingbabe halor kane ka jingjia bad pynthikna ba ka skul ka ngeit skhem ia ka jingburom para niam.
Ki dkhot ka Bajrang Dal kila kam ba une u nonghikai ula knieh ia kine ki jingteh kti, kaba la ktah ia ka jingsngew jong ki riewngeit Hindu.
