Shillong, Rymphang 20 : U Myntri Rangbah ka Jylla Conrad K Sangma ha ka sngi Ba-ar, ula pynpaw ba ka Sorkar Jylla kala kut jingmut shisha ban pynbeit ia ka kam iakajia pud bad ka Assam.
Kat kum ka jingong jong u, ka Sorkar kala kyrpad ruh ia ka Sorkar Assam ba kan tuklar ha kaban weng noh ia ki ejahar bala mudui pyrshah ia ki 4 ngut ki nongshongshnong ka Jatalong bala bthah da ka Karbi Anglong Autnomous Council (KAAC) halor ka jingpynpra ia u maw nongrim.
U Conrad ula ai ruh ka jingkular ba ka Sorkar kan sa leh ia kaba donkam pyrshah ia ka jinglum khajna beain hapoh u pud u sam jong ka Jylla.
Haba jubab ia ka motion bala wanrah da u MLA ka Congress na Mawhati Bah Charles Marngar, u Conrad ula ong “Nga kwah ban ban biang ba kumba long ha ki snem bala leit bad kumba la pyni da ka Sorkar MDA-I ha ki san snem bala leit, ngi la kut jingmut ban pyniaid shakhmat ia ka kam iapynbeit noh shisyndon ia ka jingiakajia khappud. Na ka bynta kane, ngi donkam ban iatreilang baroh lang”.
Halor ka jingjia ha Jatalong, u Conrad ula ong ba ia ka ejahar la mudui da u Ranger jong ka KAAC ym da ka Sorkar Assam.
“Kala don ka hukum ban kem pyrshah ia 4 ngut ki nongshongshnong. Kumta, u Chief Secretary ka Jylla ula thoh sha u Chief Secretary ka Assam ba kyrpad ban weng noh ia ki case pyrshah ia kine ki 4 ngut haba pynshong nongrim naka jingiaid ka jingiakren….nga ruh nga la kren hi dalade ia u Myntri Rangbah ka Assam bad nga la kyrpad ia u ba katba kine ki jingiakren ki dang iaid, katba ngi dang pyrshang ban pyniaid shakhmat ia ka jingpyrshang ban wad ia ki lynti ban iapynbeit ia ki jingkajia, kum kine ki jingjia kin nang pynjynjar shuh shuh bad kumta kat kaba lah, ngi dei ban pynbeit bad ngi la mynjur ruh ba u Myntri Rangbah ka Assam un sa khmih ia kane ka kam” ula ong.
Halor ka jinglum khajna beain, u Myntri Rangbah ula ong ba kum kine ki jinglum khajna kila jia ym ha ka jaka ba khmih da ka Sorkar Meghalaya namar kum ka Jylla kala pynhap ia u synsar kum u marrep.
Ula ong ba kum kine ki jingjia kila jia ha ki jaka ba khmih da ka KAAC bad bynrap “Lada don kum kine ki kam, ngi lah ban iakren ia kane bad ka Sorkar Assam”.
