Nongpoh, Rymphang 20 : Ka Synjuk ki Rangbah Shnong ka Ri-Bhoi, kala ujor ejahar pyrshah ia kawei ka YouTube Channel ba ai kyrteng ka 7Trep TV namar ka jingpynmih ia ka khubor thaw hi ba pynthohbria ia u Chairman ka Synjuk Bah BB Makdoh.
Ia kane ka ejahar la mudui da u Bah Makdoh ha ryngkat ka Synjuk hapoh ka Nongpoh Police Station bad la ai copy ruh sha u Superintendent of Police ka Ri-Bhoi District ba kyntu ba un shimkhia mar mar ia kane ka kam.
Kane kala jia hadien ka jingialang ba kyrkieh jong ka Synjuk kaba long hynne ka sngi Ba-ar, kaba la khot ban iakren sani ia kane ka khubor jong ka 7Trep TV.
Kane ka YouTube Channel kala pynmih ia ka khubor ba kynthoh pyrshah ïa u Chief Executive Member ka KHADC Bah Pynïaid Sing Syiem, kaba ka jingkynthoh kala mih tang da ka sur jong u briew u bym lah ban tip u dei uei.
Hynrei, pynban ha kane ka khubor la buh pat da ka dur passport size jong une u rangbah Bah BB Makdoh khlem ka jingtip jong u.
Une u Rangbah bad ka Synjuk kila kyntu ia u SP ka Ri-Bhoi ba un shmkhia bha ïa katei ka kam namar kum ka Synjuk kam kwah ba kum kitei ki channel kiba ïalam bakla ïaki paidbah kin kharoi naka por shaka por.
